“Tirana do t’i lërë Bylisit Kupën dhe do ta ketë rrugën e lirë për kampionat”. Ishte kjo një ndër “marrëveshjet” që ka marrë jehonë sa i përket dy ekipeve pas takimit të parë të zhvilluar në “Adush Muça”. Një motivim më tepër për bardheblutë që skenari i eliminimit të mos mbërrinte në një kohë që titulli i Superiores mund të vendoset në ndeshjen e fundit ku si për ironi është pikërisht një tjetër përballje ndaj Bylisit. Në një intervistë për “Gol Pas Goli”, trajneri i Tiranës, Emanuel Egbo u shpreh:
“I kemi mbyllur gojën të gjithëve atyre që na kanë sulmuar në ndeshjen e parë që Tirana do t’ia lërë Bylisit Kupën, do të bëhet kështu apo do të bëhet ashtu. Sot ishim edhe të freskët, kishte kushte më të mira për futbollistët që të luanin futboll. Thonin që Tirana do t’ia lërë finalen Bylisit. Po se për çfarë arsye, nuk e kuptoj.
I kam thënë drejtuesve që në të ardhmen duhet të vazhdojmë me këtë bazë që na ka sjellë deri këtu. Do të largohen vetëm ata lojtarë që nuk duan, baza do të jetë kjo”.
