Edhe pse dyshohej se një paciente mund të ishte kontaminuar me Koronavirus në Kosovë, analizat kanë treguar se nuk ka asnjë rast të prekur me këtë virus në këtë vend.
Bëhet me dije se në Kosovë janë rritur masat e sigurisë në kuadër të parandalimit dhe përhapjes së këtij virusi vdekjeprurës. Në pikën kufitare që lidh Kosovën dhe Shqipërinë, ka ekipe mjekësh, të cilët janë në gatishmëri 24 orë.
Mjekët e klinikës infektive në QKUK, kanë marrë masa për t’u përballur me situatën dhe është krijuar hapësira e veçantë se ku duhet të trajnohen personat.
Sipas mjekut të kësaj klinike, Valbon Krasniqit, çdo gjë është në kontroll pasi kjo klinikë ka traditë të gjatë trajtimin dhe mjekimin e të sëmurëve në rrugët e frymëmarrjes.
Ai shton se kanë patuar disa raste të dyshimta, të cilat janë menaxhuar mjaft mirë dhe në teste kanë rezultuar negative.
“Është e vërtetë se tashmë Koronavirusi është shpall emergjencë botërore nga ana e Organizatës Botërore të Shëndetësisë. Shumë vende janë prekur nga ky virus duke përfshirë edhe vendet evropiane, edhe Kosova nuk mund të jetë e kursyer nga prekja eventuale e këtij virusi.
Klinika Infektive ka një traditë të gjatë në mjekimin dhe trajtimin e të sëmurëve në rrugët e frymëmarrjes edhe Koronavirus është një virus i cili po shkakton infeksione të rrugëve respiratore. Dhe masat e përgjithshme të cilat ndërmerren janë pak a shumë të ngjashme sikurse me viruset tjerë. Ne si Klinikë Infektive kemi pasur disa raste të dyshimta dhe i kemi menaxhuar mjaft mirë dhe fatmirësisht ato tri raste të cilat janë testuar për këtë grip kanë dalë negativ, pra nuk kanë qenë të prekur nga Coronavirusi”, ka thënë Krasniqi.
