Drejtori i asociuar pranë Vëzhguesit të Të Drejtave të Njeriut, Fred Abrahams për RTV Ora ka shprehur shqetësimin e tij për mediat në vend.
Abrahams:Jam i shqetësuar për situatën e medias në Shqipëri sot. Nuk është e njëjta. Nuk ka abuzime të hapura. Nuk kemi të bëjmë me një situatë të viteve ’90 ku gazetarët rriheshin përpara dyerve të shtëpive të tyre, siç ka ndodhur në Tiranë. Por kemi të bëjmë me një formë tjetër presioni, që mund të jetë shumë herë më e rrezikshme dhe e vështirë. Ka të bëjë me kontrollin financiar.
Pronarët e medieve kanë një influencë të madhe mbi atë që mund të publikohet ose jo. Këtë mund ta shohim mjaft mirë me mbulimin mediatik që është bërë gjatë pandemisë, apo protestave ku bie në sy anësia ndaj qeverisë nga shumë media. Kjo ndodh pikërisht për shkak të interesave financiare dhe kontrollit financiar. Kjo është një çështje tmerrësisht e rrezikshme. Fatkeqësisht nëse shohim politikën në Shqipëri, shikojmë një polarizim midis palëve, pra është një vend i vogël me përçarje të mëdha në shoqëri. Aq më keq mes partive politike. Nga të gjithë këta faktorë, ata që vuajnë më shumë janë njerëzit. Ata vazhdojnë të ikin nga vendi.
Shpresoj që të jem i gabuar, por kam frikë se pjesëmarrja në zgjedhjet e ardhshme do të jetë i ulët, sepse i ulur është edhe besimi në çështjet politike. Kësisoj njerëzit nuk po votojnë me dorë, por me këmbë, me këtë nënkuptoj që ata po udhëtojnë drejt vendeve të tjera, pasi nuk shohin një të ardhme aty. Kjo është për të ardhur keq. Kaq shumë vite pas tranzicionit politik, kaq shumë vite kur unë kam qenë në Shqipëri në fillim të viteve ’90. Unë dhe shumë shqiptarë kemi shpresuar se do të ishim shumë herë më larg me progresin. Por kjo nuk do të thotë se nuk ka shpresë.
