Kandidati për deputet i koalicionit opozitar, PD-AN, Dashamir Shehi është shprehur kundër takimeve elektorale të kryedemokratit Lulzim Basha ku shfaqet në mes të turmave me njerëz pa respektuar masat anti-COVID. Megjithatë për Shehin, as kundërshtari i tyre politik, Edi Rama nuk është më mirë, duke thënë se kryeministri nuk mbledh njerëz në takime për fasadë, por në “zyrat e PS që janë plot”.
“Nuk jam dakord me këtë punë, por nuk është se Rama nuk po shpëton shqiptarët, se pas orës 8:00 ik shihi zyrat e PS që janë plot, nuk është se po i vjen dëmi Shqipërisë nga takimet e Bashës. Kur bën takime të organizuara, Basha i ka takimet me maska, Rama i mbledh në zyra”, tha Shehi.
Përsa i përket fushatës elektorale dhe zgjedhjeve të 25 prillit, Shehi tha se PD-ja ende nuk ka fuqinë që ta mundë e vetme PS-në, e për këtë i nevojitet me patjetër LSI-ja. Ai shtoi se pas zgjedhjeve opozita ka nevojë për debat të brendshëm. Shehi nuk e ka përjashtuar as mundësinë e një bashkëpunimi me partinë e Jozefina Topallit dhe Astrit Patozit.
“Patozi dhe Topalli, nuk i shoh si kundërshtarë, do doja që këto të ishin të gjithë këtu, nuk u mbërrit, por nuk e quaj një dramë të madhe, nuk e quaj të pamundur bashkëpunimi pas, uroj që të ruajnë frymën opozitare, kundërshtari është Edi Rama”, tha ai.
