Mediat pranë mazhorancës kanë publikuar argumente për një kandidat të PD-së në Vlorë, që sipas tyre është pronari më i madh i pronave në bregdet dhe që është i lidhur me familjen e Sali Berishës.
Këto media kanë folur për kandidimin e Fation Veizajt, ish-administratorin e Armo’s si kandidat në listën e sigurtë të PD-së së Vlorës, i cili, në fakt ishte dhe sebepi i revoltës së Bujar Leskajt pas zyrtarizimit të listës që solli Lulzim Basha.
Shumë thanë që revolta ishte për Ina Zhupën e cila ishte e dyta në Vlorë, por faktet që ndodhën më pas, nxorën përfundimin se shkaku i vërtetë ishte Veizaj, e pikërisht për ta betonuar këtë të fundit atje mbërriti “eminenca gri” e Sali Berishës: Agron Kuliçaj. I cili së bashku me Sahit Dollapin dominojnë sektorin e organizimit në Partinë Demokratike.
Dy nga njerëzit më operativë të Berishës në qeverinë e tij tek policia, nëntoka dhe paratë, janë realisht fuqia motorike e PD-së së Lulzim Bashës. Ku shkojnë Dollapi e Kuliçaj, vendosin pikat mbi “i”.
Kuliçaj vendosi rregullin në Vlorë, duke “zbutur” Bujar Leskajn e ta pranojë me hir apo me pahir Fatjon Veizajn si të tretin në Vorë, e që në skenarin më të keq të PD-së në këtë qark ai do të jetë deputet.
Por sipas argumenteve që mediat pranë mazhorancës publikojnë, Veizaj, zotëron 1,635,868 metra katrorë tokë në bregdetin më të kushtueshëm të Shqipërisë, çka sipas këtyre qarqeve është pjesë e një makinacioni. Makinacion, që ata e adresojnë tek Sali Berisha dhe familja e tij. Vetë ky fakt përbën nëse është e vërtetë një zhvillim skandaloz, që thjesht adresimi apo publikimi nga qarqet e pushtetit është i rëndë. Pushteti e ka edhe gurin por edhe arrën për ta adresuar aty ku duhet nëse ka të dhëna për një gjë të tillë, pasi jemi në një situatë të rëndë edhe në qoftë se ka dyshime që fakt ekziston.
E pakta duhet të ketë adresim dhe denoncim në SPAK; si për ndjekje penale, por edhe për sekuestrim pasurie.
Por natyrisht nuk bëhet se në fakt ky është problemi; më 25 prill, një pjesë e rëndësishme e kandidatëve për deputetë janë as më pak e as më shumë por njerëz të shënjeshtruar nga SPAK; qoftë për të nisur një dosje penale, por edhe për sekuestrim pasurie. E nëse je deputet, SPAK nuk mund ta bëjë krejt lehtësisht por i duhet të nisë një procedurë parlamentare. E cila nis me Komisionin e Mandateve, më pas në Komisionin e Ligjeve, e më pas në seancë. Por nuk është ky subjekt i vetëm i SPAK, pasi sipas gjasave, bëhet fjalë për mbi 10 deputetë që janë në shënjestër.
Po çfarë do të ndodhë nëse vërtetë Prokuroria Speciale nis një betejë gjyqësore ndaj tyre? Thjesht SPAK do ta ketë më të vështirë kur janë në Parlament sesa kur janë jashtë. Veizaj, Damian Gjiknuri, Ilir Beqaj, e strumbullari Tom Doshi, janë dukshëm, bëjnë ‘muu’ që do të jenë subjekt i SPAK dhe duke qenë kështu, ata nuk duhet të jenë në Parlamentin e ri. Nëse do të jenë, do të bëjnë rezistencë për të mos u hetuar, mos u arrestuar, apo të mos u sekuestrohet pasuria. Ja kaq e thjeshtë është puna…/Pamfleti
