Sport27 Shtator 2018, 15:37

Takim pesë-palësh në zyrat e FSHF, gjithçka gati për derbin

Shkruar nga Pamfleti
Takim pesë-palësh në zyrat e FSHF, gjithçka gati për

Gjithçka duket gati për sfidën Tirana-Partizani. Për derbin e programuar për t’u luajtur ditën e nesërme në orën 19:45 në “Selman Stërmasi”, janë marrë të gjitha masat e duhura nga FSHF në bashkëpunim me dy klubet, kompaninë e sigurisë private dhe Policinë e Shtetit. Këta të fundit për herë të parë në një derbi do të qëndrojnë jashtë perimetrit të stadiumit, por të gatshëm për të ndërhyrë për çdo incident.

Më poshtë është dhe deklarata zyrtare e FSHF:

“Pas takimit të djeshëm në Drejtorinë e Policisë të Qarkut Tiranë, në lidhje me derbin e kryeqytetit Tirana-Partizani, FSHF ka iniciuar sot një takim të dytë në zyrat e saj nën drejtimin e Sekretarit të Përgjithshëm, Ilir Shulku, përfaqësuesve të klubeve respektive të kryeqytetit, Tiranës e Partizanit, shefit te Sektorit të Garave, Lysien Nurishmi, si dhe autoriteteve të sigurisë private.

Si një çështje shumë sensitive për garantimin e sigurisë publike për specifikën e një ndeshje të tillë derbi, sekretari i përgjithshëm Ilir Shulku u solli edhe një herë në vëmendje palëve angazhimin e tyre maksimal, për mbarëvajtjen e një takimi të tillë. Ai ftoi përfaqësuesit e klubeve të gjejnë dakordësinë e tyre në lidhje me vendqëndrimet e tifozerive përkatëse, teksa nga ana e tij Drejtori i klubit Tirana, Arbi Laçi garantoi marrjen e masave totale për të mos patur asnjë problematikë serioze mes tifozerive gjatë derbit. Gjithashtu sekretari Shulku ftoi klubet të vazhdojnë komunikimet e tyre sensibilizuese me tifozeritë respektive për të shmangur çdo incident të mundshëm që do t’ia cënonte bukurinë një derbi të tillë.

FSHF nga ana e saj do të vazhdojë të ndjekë me kujdesin maksimal çdo detaj organizues për një ecuri sa më normale të takimit. Ajo gjithashtu kërkon një vigjilencë të madhe edhe nga forcat e policisë së shtetit, të cilat edhe pse nuk do të jenë brenda perimetrit të stadiumit, sërish ftohen të jenë në gadishmëri të plotë për çdo eventualitet.”

Sport