Ish-deputetja e Partisë Demokratike, Oriola Pampuri në një deklaratë për shtyp ka risjellë tenderin e bërë në shtator me vlerë 5 milionë euro për të blerë mjete mbrojtëse anti-COVID.
Në deklaratën e saj për shtyp, Pampuri u shpreh se Komisioni i Prokurimit Publik, i s’kualifikoi të gjithë ofertat më të ulëta, duke shpallur fituese kompaninë me ofertën më të lartë.
“Në vend që paratë e qytetarëve të përdoren me kujdes në këtë kohë krize, qeveria e Edi Ramës, në mënyrë arbitrare, vendos t’i ndajë këto para me klanin që ofron më shumë para për xhepin e tij. Kjo është një qeveri që vjedh edhe në kohë pandemie. Këta nuk heqin dorë nga pasurimi i paligjshëm, edhe kur e dinë se qytetarët mezi ia dalin të mbyllin muajin dhe marrin borxh për të blerë ilaçet anticovid. Pandjeshmëria e kësaj qeverie dhe e këtij Kryeministri, arroganca, babëzia për të përfituar në çdo kohë dhe në çdo rrethanë është fytyra e kësaj qeverie”-u shpreh ajo.
Pampuri akuzoi se Komisioni i Prokurimit Publik shpalli fituese kompaninë me ofertën më të lartë, e renditur e 10-ta.
“Në shtator të këtij viti, Ministria e Shëndetësisë ka hapur një tender me vlerë 5 milionë euro për të blerë disa mjete mbrojtëse anticovid, vlera e të cilave nuk shkon kurrë më shumë se 1.5 milionë euro. Tenderi kualifikoi disa kompani me oferta nën 2 milionë euro, por një vendim i organi tjetër të qeverisë, Komisioni i Prokurimit Publik, i s’kualifikoi të gjithë ofertat më të ulëta.
Ndër 12 kompani ofertuese, ai shpalli fituese kompaninë me ofertën më të lartë, e renditur e 10-ta. Për shkak të kësaj lufte mes klanesh në qeveri, pajisjet anticovid do të blihen me çmim 3 herë më të lartë se ofertat e s’kualifikuara”, denoncoi ish-deputetja.
