Krerët e politikës shqiptare bëhen patriotë vetëm para zgjedhjeve, gjatë 30 viteteve treguan gatishmëri për të shitur Shqipërinë për pushtet; Berisha aleati më i madh i Millosheviçit, i fali detin Greqisë, Meta e mbështeti, Rama tentoi të shkëmbente territore të Kosovës në këmbim të çmimit Nobel për paqe
Në prag të zgjedhjeve parlamentare të 25 prillit 2021, krerët e politikës shqiptare befas janë bërë sërish patriotë facebooku, ndërsa kanë nisur një luftë të ethshme duke akuzuar njëri-tjetrin se cili është më tradhtar. Rama akuzon në vijimësi Berishën për shitje të territoreve dhe bashkëpunim me qarqet e Beogradit.
Këto ditë, Rama ka nisur një fushatë ndaj aletatit të tij, Lulzim Basha, duke e akuzuar se ka hetuar UÇK dhe se ka fshehur masakrat e ushtrisë së Millosheviçit ndaj shqiptarëve në Kosovë.
Nga ana tjetër, Berisha, Meta dhe Basha akuzojnë Ramën dhe Hashim Thaçin për një plan “Vuçiç” për ndarjen e Kosovës. Kjo lojë do të zgjasë deri ditën e zgjedhjeve, ndërsa më pas, deri në prag të zgjedhjeve të tjera në 2025, do të përsëritet e njëjta histori pazaresh dhe plaçkitjesh në bashkëpunim, të buxhetit të shtetit dhe të pasurive publike.
Më seriozisht këtë lojë e ka marrë Ilir Meta, i cili ditën flet për flamur dhe Vojo Kushin, ndërsa natën bën pazare, pastron para dhe punon kundër interesave kombëtare.
Megjithatë, fatkeqësisht, të gjitha akuzat që krerët e politikës shqiptare po i bëjnë këto ditë njëri-tjetrit, janë të vërteta.
Sali Berisha theu embargon që Perëndimi i kishte vendosur Millosheviçit, duke furnizuar me naftë makinerinë e luftës së Kasapit të Ballkanit, i cili po bënte masakra në Bosnje. Sali Berisha dhe ushtari i tij Bashkim Gazidede kanë zhvilluar takime të fshehta me Millosheviçin në Ohër si dhe me Arkanin në Shkodër. Ata torturuan dhe zhdukën biznesmenin patriot shqiptar, Remzi Hoxhën, vetëm se ky i fundit ishte në dijeni të këtyre takimeve. Në vijim Sali Berisha e konsideroi si bandë terroristi UÇK dhe përndoqi në Shqipëri ushtarët e UÇK. Sali Berisha ishte gjithashtu kundër Rambujesë si dhe kundra bombardimit të Serbisë nga NATO.
Në vitin 2009, Sali Berisha dhe Lulzim Basha i falën Greqisë 350 km2 det, në fshehtësi të plotë, vetëm për interesa pushteti. Ilir Meta e mbrojti këtë marrëveshje në Gjykatën Kyshtetuese bashkë me avokaten e qeverisë Berisha, Marsida Xhaferllari. Marrëveshja u hodh poshtë nga Gjykata Kushtetuese si anti-kombëtare. Më vonë Ilir Meta u bë patriot për të shpëtuar nga shpërbërja bandën e tij partiake familjare dhe nuk pranon të caktojë negociator për një marrëveshje të re. Ilir Meta, me anë të të besuarit të tij, Ilir Kulla, porositi edhe një lajm të rremë në mediat italiane për gjoja 1 mijë kontenierë me plehra që do të hynin në Shqipëri. Mashtrimi dhe loja për pushtet u zbulua shpejt, por akti i Metës ishte një akt i pastër anti-kombëtar, pasi jo vetëm provokoi përfshirjen e vendit në trazira, por ky mashtrim kriminal dëmtonte imazhin turistik të vendit.
Në fushën e shitjes së interesave kombëtare për pushtet nuk mbetet pas as Edi Rama, i cili po përpiqet ta veçojë veten nga Berisha, Basha dhe Meta. Edi Rama, në bashkëpunim me Hashim Thaçin dhe Vuçiçin bën një plan për t’i dhuruar Serbisë sipërfaqe nga territori i Kosovës, në këmbim të njohjes së Kosovës nga Serbia. Për këtë qëllim Rama shkarkoi edhe Ditmir Bushatin si ministër të Jashtëm, duke e zëvëndësuar me Gent Cakajn. Rama synonte të bëhej protagonist i një marrëveshje mes Serbisë dhe Kosovës, duke u paraqitur si një lider global që të nominohej për çmimin Nobel për paqen, duke shkëmbyer disa territore të mbrojtura me gjak. Pazari anti-shqiptar u denoncua nga Ramush Haradinaj, të cilin Rama e paditi për shpifje. Por, më pas pazari u denoncua nga personalitete të Perëndimit dhe u pranua deri diku edhe nga Thaçi. Pazari u hodh poshtë nga Gjermania dhe SHBA./Pamfleti
Ky artikull është prodhim i “Pamfleti”, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar “Pamfleti” dhe në fund të vendoset me linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
