Ditën e djeshme Florjan Binaj ishte i ftuar në emisionin “Ftesë në 5” bashkë me të atin e tij, Petrit Binaj. Babë e bir folën për marrëdhënien e tyre, familjen dhe rrugëtimin e Florit në “Portokalli”.
Petrit Binaj rrëfeu se në atë kohë, Florjani kishte fituar audicionin për në “Portokalli”, por ai nuk dinte gjë. Ai tregoi se në atë kohë nuk e kishte lejuar Florin të merrte pjesë në spektakël, sepse e kishte kapur duke pirë cigare dhe më pas u qeth qeros, pa e ditur se këtë gjë e kishte bërë për rolin e tij.
“Unë nuk e lejova që të shkonte se në atë kohë e kapa duke pirë cigare dhe më pas u qeth qeros. Ai ishte qethur për rolin e tij, por unë mendoja se kishte marrë rrugë të keqe”, shpjegoi ai.
Ndërsa Florjani tregoi se herën e parë babai i tij nuk e kishte njohur dhe se vetëm gjyshja e kishte dalluar nga zëri teksa luante rolin e Edi Ramës në një skeç.
“Ishin ulur para televizorit dhe dola unë në skenë si Edi Rama. Prita për reagim, por asnjëri nuk po fliste. Fillova t’i pyes si ju dukej, por nuk po më njihnin. Vetëm gjyshja e dalloi zërin dhe më tha: Po si zëri yt ky mor bir. Babai nga ana tjetër na tha të pushonim se donte të dëgjonte skeçin dhe akoma nuk e kishte kuptuar që isha unë aty”, rrëfeu aktori.
