Policia ka arrestuar një tjetër person të dyshuar si bashkëpunëtor në vrasjen e Ridvan Hysenit, të “fortit” të Shkodrës. Në pranga ka rënë 25-vjeçari Milkjor Gjoka pasi dyshohet se ndihmoi vëllezërit Hydajet dhe Duel Mehmedaj, përkatësisht 33 dhe 31 vjeç në eliminimin e Hysenit. Ngjarja u regjistrua një ditë më parë pranë një pike karburanti në fshatin Mushan të Dajçit, teksa policia ka shpallur në kërkim dy vëllezërit Mehmedaj.
Si ndodhi vrasja
Disa orë përpara krimit palët ishin konfliktuar me djalin e viktimës dhe ky i fundit kishte ndërhyrë në sherr. Vëllezërit Mehmedaj nuk e kanë lënë me aq ngjarjen dhe e kanë ndjekur Ridvan Hysenin, i cili lëvizte me automjetin e tij tip “BMË”, e bardhë dhe kur viktima ka ndaluar pranë një pike karburanti në Mushan të Dajçit, pala kundërshtare ka qëlluar me breshëri plumbash, duke vrarë të ‘fortin’ e Shkodrës. Më pas vëllezërit janë arratisur me motor dhe policia i ka shpallur persona në kërkim. Vrasësit nuk kanë pasur kohë që të marrin me vete armët e krimit, por i kanë lënë në vendngjarje.
Grupi hetimor ka sekuestruar në vendin e ngjarjes, në cilësinë e provës materiale, një armë zjarri pistoletë, dy krehra me fishekë pistolete, gëzhoja të armës automatike, automjetin e viktimës dhe prova të tjera të vlefshme që do t’i shërbejnë zbardhjes dhe dokumentimit të ngjarjes. Ato u dërguan në laboratorin kriminalistik për të gjetur gjurmë të gishtërinjve të të dyshuarve kryesor në vrasje.
Po në vijim të veprimeve u bë arrestimi në flagrancë, për veprën penale “Moskallëzimi i krimit”, i shtetasve B. M. 49 vjeç, banues në fshatin Mushan, Dajç, Shkodër dhe M. G., 49 vjeçe, banuese në fshatin Suka-Dajç, Shkodër, të cilët kanë qenë prezent kur ka ndodhur ngjarja dhe nuk kanë kallëzuar në organet kompetente për krimin e ndodhur. FNSH dhe RENEA, kanë vijuar përgjatë gjithë natës dhe po vijojnë kontrollet intensive në banesa e objekte të ndryshme për kapjen e dy autorëve të tjerë të kësaj ngjarjeje.
CV-ja kriminale e Ridvan Hysenit
Mehmedajt konsiderohen si fis ‘i fortë’ në zonën Shkodrës dhe janë nipat e Gëzim Mehmedajt, i cili në vitin 1992 vrau efektivin e RENEA-s, Arben Ujka. Kjo familje ka marrëdhënie të forta me atë të Ibrahim Licit, i cili është një prej të dyshuarve për vrasjen e vëllezërve, Astrit dhe Brahim Bilali.
Ridvan Ramazani (Hyseni), ka qenë armik me një prej personave më të fortë në Shkodër. Bëhet fjalë për Admir Koçian, i njohur ndryshe si Mir Koçia. Ky i fundit u ekzekutua në mënyrë mafioze në vitin 2012, teksa ishte duke shkuar me makinë në shtëpi. Koçia ishte i dyshuar nga policia për vrasjen e Çim Cafit, Astrit Meshnunit si edhe disa krime të tjera të ngjashme, të cilat nuk u vërtetuan asnjëherë.
Në vitin 2008 është ekzekutuar edhe xhaxhai i 46-vjeçarit, Enver Hyseni (Ramazani). Ky i fundit asokohe 50 vjeç, babai i tre fëmijëve u vra teksa po drejtonte mjetin”Benz” ML në aksin rrugor Dajç-Darragjat.
Duke pasur parasysh të gjitha këto hesape, fillimisht u mendua se vrasja e Ridvan Ramazanit ishte bërë për hakmarrje, por me pas rezultoi se motivi ishte pas një sherri të ndodhur pak orë përpara eliminimit të tij. Dy të dyshuarit kryesorë ishin përplasur me të birin e viktimës, i cili kishte ndërhyrë për të shuar gjakrat, por përfundoi i pa jetë nga breshëria e plumbave.
