Një vrasje aksidentale është shënuar gjatë orëve të natës në Bulqizë. Viktimë ka mbetur shtetasi Elidon Basha 22 vjeç, i cili së bashku me mikun e tij kishin dalë për gjah. Ende nuk dihen rrethanat e vrasjes, por mësohet se i riu ka marrë një plumb në shpatull. Burimet zyrtare raportojnë se rreth orës 23:30 të mbrëmjes së djeshme, në një kodër të fshatit Fushë Bulqizë, shtetasi Klodian Kola së bashku me shtetasin Elidon Basha në rrugën Fushë Bulqizë – Kodër Dane, dyshohet se kanë qenë duke gjuajtur me armë gjahu, çifte.
Nga pakujdesia Klodiani ka plagosur shokun e vet, Elidonin i cili ka humbur jetën rrugës për në spitalin e Tiranës. Menjëherë pas njoftimit të marrë u ngrit grupi hetimor për zbardhjen e ngjarjes.
Falë veprimeve të para hetimore, nën drejtimin e Prokurorisë, u gjetën dhe sekuestruan në cilësinë e provës materiale arma e gjahut, një elektrik dore, motomjeti me të cilin këta shtetas kishin shkuar për gjueti dhe sende të tjera të vlefshme që do t’i shërbejnë zbardhjes së ngjarjes. Nën drejtimin e Prokurorisë, strukturat hetimore të Drejtorisë vendore të Policisë Dibër vijojnë punën për zbardhjen dhe dokumentimin e plotë të ngjarjes.
