Policia greke në Selanik ka zbardhur rrëmbimin e një 23-vjeçari shqiptar, ngjarje e ndodhur në shkurtin e vitit të kaluar. Sipas policisë autorët janë tre bashkatdhetarë, të cilët e mbajtën të riun peng më shumë se 24 orë në një makinë.
Shqiptarët i kërkuan familjarëve të 23-vjeçarit shumën prej 2500 euro dhe pas disa negociatave, pranuan ta lirojnë edhe me 1000 euro.
Sipas policisë tre bashkatdhetarë të të riut u identifikuan si autorë të pengmarrjes, ndërsa dy femra të reja greke që morën përsipër të merrnin paratë, janë gjithashtu të përfshira në çështje.
Nga hetimet rezulton se motivi i veprimit të tyre duket se kanë qenë mosmarrëveshjet financiare që autorët kishin me 23-vjeçarin. Dosja e çështjes kundër tyre do të paraqitet në Prokurorinë e Selanikut dhe më pas urdhër-arrestet pritet të lëshohen nga hetuesi kompetent.
