Kryediplomati rus Sergei Lavrov në një konferencë për media i dërgoi mesazhe mbështetjeje Greqisë, para nisjes së kontakteve eksploruese me Turqinë.
Po ashtu ai e konsideroi si një vendim tërësisht ligjor nismën e Athinës për t’u zgjeruar me 12 milje në det.
Sipas agjencisë ruse të lajmeve TASS referuar postimeve të ambasadës ruse në Greqi në mediat sociale, Sergei Lavrov, komentoi edhe nismën e Greqisë për t’u shtrirë me 12 milje në detin Jon.
Në këtë kontekst, Lavorv e konsideroi një vendim krejtësisht ligjor njoftimin e Athinës për zgjerimin e zonës detare.
Ai shtoi: “Është një gjë tjetër, kur ujërat territoriale të përcaktuara nga një shtet janë në kundërshtim me interesat e një shteti fqinj. Nëse këto interesat janë të ligjshme sipas Konventës për Ligjin e Detit, është e nevojshme të kërkohen zgjidhje përmes dialogut dhe ekuilibrit të interesave”.
Lavrov apeloi që të gjitha problemet që lidhen me Zonat Ekskluzive Ekonomike të Greqisë dhe Qipros të zgjidhen përmes dialogut. Duke komentuar rinisjen e bisedimeve Greqi-Turqi në fund të janarit, kryediplomati rus tha se kjo është mënyra e duhur për diskutimin dhe zgjidhjen e çështjeve.
Po ashtu ministri i Jashtëm rus theksoi se askush nuk dëshiron operacione ushtarake në Mesdheun Lindor, duke shtuar se nëse Rusia do të mund të shërbejë për diçka do t’i përdorë të gjitha marrëdhëniet e saj të mira me vendet e përfshira. “Ne jemi të gatshëm, nëse natyrisht na kërkohet ta bëjmë këtë”, tha ai.
