Është arrestuar edhe zëvendësja e “BOKI 13” në organizatën e këtij të fundit, Jasna Mandiç si e dyshuar e re për rastin “Reketi”, e cila është dërguar në Gjykatën Penale. Jo zyrtarisht mësohet se është arrestuar edhe babai i “Boki 13” si i dyshuar, megjithatë një gjë e tillë ende nuk është konfirmuar nga organet e rendit.
Prokuroria për Mandiç ka kërkuar paraburgim, ndërkaq mbetet e paqartë se çfarë do të ndodhë me babain e “Boki 13”.
Sot u bë e ditur se Vilma Ruskoska ka zgjeruar hetimin për rastin “Reketi”. Katër të dyshuar tjerë së bashku me Boki 13 janë cak i hetimit për mashtrim dhe pastrim parash përmes Organizatës humanitare “Lidhja Ndërkombëtare”, themeluesi i së cilës është Bojan Jovanovski.
Përveç Boki 13, të dyshuar janë edhe Jasna Mandiç- nënkryetare e OJQ-së, i ati i saj, asistentja personale, por edhe nënkryetarja e Parlamentit, Frosina Remenski. Sipas aktakuzës, deputetja e LSDM-së ka pasur rol të veçantë gjegjësisht, ka shkuar nëpër takimet e Boki 13 që të lihet përshtypja se pas projekteve që i ofron OJQ-ja e Jovanovskit, qëndron qeveria.
Organizata humanitare ka tërhequr rreth 1 milionë euro nga dy biznesmenë kinse për projekte për shtëpi pleqsh./ZËRI