Kristiano Ronaldo e nisi titullar ndeshjen kundër Atletiko Madridit dhe shënoi gol në minutën e 53-të, 4 minuta para se Antuan Griezman të barazoi gjithçka në 1-1. Portugezi Ronaldo u largua nga loja në minutën e 64-t, duke vazhduar kështu me planin e Zinedine Zidane, që të pushojë në këtë fazë të rëndësishme të sezonit. Pra Zidane po e ruante Ronaldon nga ndonjë dëmtim i mundshëm dhe që të ishte i freskët e në formë për sfidat e ardhshme që janë të rëndësishme.
“E ndërrova Kristianon sepse duhet të pushojë, kanë mbetur edhe shumë ndeshje. Kristiano është i mençur, ai e di se duhet të pushojë kohë pas kohe. Çdo ditë po ndihet mirë e më mirë”, u shpreh Zidane pas ndeshjes me Atletikon.
Më pas ai komentoi edhe golin e bukur që shënoi sot në derbi sulmuesi portugez, i 20-ti në 10 ndeshjet e fundit dhe i 40-ti për portugezin deri më tani këtë sezon në të gjitha garat. “Ky është Kristiano, e ka bërë këtë gjithmonë. Shënon deri në 60 gola në sezon, nuk ka asnjë si ai”, shtoi tekniku francez i Realit të Madridit. Në fakt, Ronaldo këtë sezon ka shkëlqyer si askush tjetër në Ligën e Kampioneve, ku ka dyfishin e ndjekësve të tij, por në La Liga spanjolle rolin primar e ka Mesi që ka shënuar deri më tani 6 gola më shumë. /Pamfleti Sport