Plot 11 vite nga vrasjet e 21 Janarit në mes të bulevardit, ende nuk ka autorë politikë të dënuar. Të vetmit që e pësuan ishin përfaqësuesit e Gardës së Republikës, por edhe ata sot janë të lirë dhe askush nuk mban përgjegjësi për vrasjen e Ziver Veizit, Faik Myrtës, Hekuran Dedës dhe Aleks Nikës.
Prokuroria e Tiranës në prill të vitit që lam pas rihapi hetimet për vrasjen e Aleks Nikës, pasi nuk ka asnjë autor të dyshuar dhe të akuzuar që ka qëlluar ndaj tij. Hapja e hetimeve erdhi pas një kërkese të policisë, ndërkohë që pas gati 8 muajsh procesi është përqendruar te shqyrtimi nga e para e provave dhe riekspertimi i ngjarjes. Mësohet e prokuroria e Tiranës ka pajtuar ekspertë nga Italia që do të merren me riekspertimin.
Një vit më parë Policia e Tiranës ka dorëzuar një kërkesë në prokurori, ku kërkoi riekspertim hetimor për vrasjen e Hekuran Dedës dhe Aleks Nikës. Po ashtu kërkohej të riekspertim për plagosjen e Fatos Mahmutajt, Sokrat Godes, Erald Boshas, Artes Dybelit, Ilia Qeskos dhe Ilia Papas. Sipas informacioneve, policia ka kërkuar të kryhet riekspertim i predhës së gjetur në trupin e Aleks Nikës, të ripyeten personat që kanë dijeni, kryesisht ish-efektivë dhe efektivë të gardës që ishte në shërbim në datën 21 janar. Gjithashtu në letër-kërkesë kërkohet të ripyeten të afër të viktimave dhe dëshmitarë. Vrasja e Nikës është më e mistershmja e “21 Janarit”.
Fillimisht ai mbeti i plagosur dhe u dërgua në Turqi ku dhe ndërroi jetë. Akti i ekspertimit datë 5 maj 2014 vërteton se Nika u qëllua me një plumb. Kjo predhë është ekzaminuar edhe në laboratorin e FBI Virginia ku thuhet se ka dalë nga një pushkë me 6 viaska, por predha nuk mundi të identifikohet nëse është qitur nga tytat e pistoletave të dërguara për ekzaminim apo nga tytat e tjera. Predha e gjetur në trupin e Nikës është e kalibrit 9 mm, ndërsa policia thotë se është qitur nga një armë zjarri Mp5. Policia kërkon të kryhet rikqyrje e pamjeve filmike të fokusuar kryesisht tek Ziver Veizi, Aleks Nika, Hekuran Deda dhe të plagosurit./Gazeta Sot
