Aktualitet17 Maj 2022, 15:26

A ka hetime për deputetët? Olsian Çela: SPAK po heton 12 raste për korrupsion zgjedhor

Shkruar nga Pamfleti
A ka hetime për deputetët? Olsian Çela: SPAK po heton 12 raste

Prokuroria e Posaçme po heton disa deputetë për korrupsion gjatë zgjedhjeve. Ka qenë Kryeprokurori Olsian Çela, ai i cili u shpreh në Komisionin e Ligjeve se janë 12 raste që po hetohen nga Prokuroria e Posaçme. Deklarata e tij erdhi gjatë raportimit në Kuvend për raportin vjetor të prokurorisë për vitin 2021.

Sa i përket deputetëve janë të paktën 12 çështje që kanë shkuar për korrupsion zgjedhor në SPAK, por nuk mund të them sot ka apo nuk ka deputetë të përfshirë në korrupsion zgjedhor se ka lidhje me hetimet. Ndërkohë prokuroria e posaçme ka të dhënat e veta që lidhen me subjektet e posaçme apo veprën penale. Do ishte e pasaktë nëse sot u konfirmoja një të dhënë”, tha ai.

Ai u ndal dhe te ngjarjet kriminale në vend. Ka pasur shumë atentate kohët e fundit dhe Çela ka qenë kritik ndaj prokurorëve.

Hetimi i atentateve e ngjarjeve të rënda është një sfidë e vështirë se mjaft herë kryhen në kuadër të krimit të organizuar përmes përdorimit të personave që paguhen e kërkon angazhim në disa nivele të të gjithë njësive ligjzbatuese. Sa herë ndodh një ngjarje ka një problem. A mund t’i parandalojmë? Edhe mundet. A duhet ti zbulojmë? Patjetër. Si operojnë prokuroritë? Në kontekstin që po flas duket sikur prokurorët nuk e bëjnë punën”, tha Çela.

Megjithatë ai u shpreh se deri më sot nuk ka pasur asnjë të dhënë që prokurorët nuk duan zbulimin e ngjarjeve të bujshme apo që po mbulojnë krimet.

Për ngjarjet kriminale duhet të pranojmë që këto ngjarje janë prioritare e nuk mund te them që korrupsioni apo rastet e shpërdorimit të detyrës mund të kenë influencuar në zbulimin e ngjarjeve të tilla, nuk ka asnjë dokument apo të dhënë që të jetë bërë zyrtare nga një hetim që të tregojë përfshirje të prokurorëve apo OPGJ në fshehjen e zbulimit të autorëve të këtyre veprave penale”, tha ai.

Aktualitet Çela deputetë Hetim