Shtohet frika se bota po shkon drejt një lufte të re. Shkëndijat u dhanë që me luftën në Ukrainë, ndërsa duket se po hapen fronte konflikti në shumë zona, që sipas mediave botërore kanë futur në ankth shumë njerëz. Rusia sulmoi Ukrainën dhe po vuan e gjithë bota. Frika është se konflikti mund të përhapet.
Nga krahu tjetër jemi në prag të një lufte Kinë-Tajvan. Edhe pse ndodhet larg Europës, një konflikt atje mund të çojë botën drejt konflikti global. SHBA ka paralajmëruar se do i dalë në krah Tajvanit dhe aty ndodhet një flotë amerikane që është në gatishmëri. Nga ana tjetër Rusia ka deklaruar se do i dalë në krah Kinës nëse kemi përplasje me SHBA. Situata në Tajvan sot ka qenë tepër e tensionuar.
Në ditën e dytë të manovrave ushtarake, forcat kineze kaluan vazhdimisht kufirin detar jozyrtar midis Kinës dhe Tajvanit. Avionët luftarakë dhe anijet luftarake kineze kanë kaluar të ashtuquajturën linjë qendrore në ngushticën e Tajvanit, kumtoi Ministria e Mbrojtjes e Tajvanit në Taipei. Autoritetet flasin për një “akt shumë provokues”. Linja qendrore e ngushticës së Tajvanit konsiderohet si kufiri jozyrtar, por i respektuar kryesisht nga Kina dhe Tajvani.
Me pakënaqësi të madhe reagoi edhe kryeministri i Tajvanit Su Tseng-chang. Qeveria në Taipei nuk priste “që fqinji keqdashës do të zhvillonte një demonstrim pushteti në pragun tonë dhe do të rrezikonte arbitrarisht rrugët detare më të ngarkuara në botë me stërvitje ushtarake”, u tha Su gazetarëve. Qeveria kineze kohët e fundit deklaroi se kufiri jozyrtar, sipas saj, nuk ekziston më.
Ndërkohë SHBA thirri ambasadorin kinez ku u kritikua për sulmin në Tajvan. Kina nga ana e saj njoftoi ndërprerjen e bashkëpunimit me SHBA.
Në lojë u fut dhe Japonia. Tokio ka denoncuar sot se të paktën 5 raketa kanë rënë në zonën e saj ekonomike, një ngjarje pothuajse e paprecedent në dekadat e fundit. Ministri i Jashtëm japonez Yoshimasa Hayashi ka kërkuar ndërprerjen e menjëhershme të stërvitjes, që sipas Pekinit do të zgjasë deri më 7 gusht.
Por teksa e gjithë vëmendja ishte në Tajvan, Izraeli nis sulmet në Ripin e Gazës. Katër persona u vranë, përfshirë një vajzë pesëvjeçare dhe të paktën 15 u plagosën, njoftoi Ministria e Shëndetësisë palestineze. Po ashtu u vra edhe komandanti i “Xhihadit Islamik” në Gaza, Taisir al-Jabari. Një shpërthim u dëgjua në qytetin e Gazës dhe tym u pa në katin e shtatë të një ndërtese të lartë.
Por nuk mbaroi me kaq. Në mbrëmje organizata “Xhihadi Islamik” ju kundërpërgjigj Izraelit. Sirena të shumta u dëgjuan ndërsa më shumë se 60 raketa u lansuan drejt Yavne, Be’er Yaakov, Ashdod, por u kapën nga Iron Dome.
Pra nga dita në ditë po hapen shumë fronte lufte dhe tani e gjithë bota është në ankth.
