Shkruar nga Pamfleti
Agjentja e futbollit e akuzoi për ngacmim seksualisht për vite me radhë, nisin hetimet ndaj Presidentit të Federatës Franceze
Dëshmia e menaxheres së lojtarëve, Sonia Souid, në të cilën ajo denonconte veprimet e Noël Le Graët ndaj saj, kishte sfiduar futbollin francez dhe përbënte një element më shumë, në faktet e pretenduara kundër presidentit të Federatës Franceze të Futbollit. Tani çështja do të shkojë në gjykatë.
Souid tregon ftesa të shumta për darkë, si dhe mesazhe zanore gjatë natës që i thotë të vijë të ndajë me të një shishe shampanjë. Ajo shpjegon se fillimisht kontaktoi me të në lidhje me një punë të saj në futbollin e femrave në vitin 2013, ku Souid ishte përgjegjëse për sjelljen e Helena Costa dhe Corinne Diacre në pankinën e Clermont. Agjentja vazhdon të detajojë se një takim u zhvillua në apartamentin e Le Graet, dhe supozohej se do të merrte pjesë Brigitte Henriques, në atë kohë drejtuese e futbollit francez të femrave.
Në vend të kësaj, kur arriti aty, ajo gjeti dy gota shampanjë të mbushura dhe Henriques mungonte. Ajo thotë se nuk i preku gotat dhe i tha presidentit se duhej të shkonte te i fejuari i saj. Le Graet e la të ikte, por do të vazhdonte ta kërkonte për darkë më pas. Souid ishte 28 vjeç, Le Graet 72 në atë kohë.
“Përveç faktit se unë isha në apartamentin e tij, ai më bëri të qartë që donte që unë të përfundoja në shtratin e tij. Ai ishte delikat, përveç atij mesazhi zanor që më kërkon të bashkohesha me të për të pirë një shishe shampanjë”, tha ajo.
Agjentja e futbollit vazhdon të përshkruajë se si Le Graet do t’i dërgonte rregullisht mesazhe asaj nga viti 2014 në vitin 2017 dhe se ajo nuk i pranoi ftesat e tij.
“Sapo presidenti më bëri të qartë se, që idetë e mia të realizoheshin, duhej të hyja në shtratin e tij. Më erdhi si një tronditje, por vazhdova të qëndroja e sjellshme edhe pse po më poshtëronte”.
Pretendimet e Le Graet se nuk dinte të dërgonte një mesazh, thotë ajo, ishin ato që e shtynë të shprehej: “Ai nuk ka frikë nga asgjë dhe nga askush. Ai mendon se është i paprekshëm, ndoshta është.”
Dëshmia e Souid është duartrokitur nga ministrja franceze e sportit, Amelie Oudea Castera, dhe ajo thotë se e vërteta do të dalë në shesh shumë shpejt.
Sipas zyrës së prokurorit të Parisit, i pyetur nga AFP, një hetim për ngacmimet morale dhe seksuale u hap të hënën, pas raportimit për “zemërim seksist” që synonte Noël Le Graët. Ky raport është mbledhur nga auditorët e Inspektoratit të Përgjithshëm të Arsimit, Sportit dhe Kërkimit (IGESR) sipas Le Monde.
