Bota18 Janar 2023, 14:51

Agresioni në Ukrainë, Putin: Fitorja e Rusisë është e pashmangshme!

Shkruar nga Pamfleti
Agresioni në Ukrainë, Putin: Fitorja e Rusisë është e

Presidenti rus, Vladimir Putin gjatë një vizite në një fabrikë armësh në Shën Petersburg ka deklaruar se nuk ka asnjë dyshim se Rusia do të fitojë luftën kundër Ukrainës.

Udhëheqësi rus u shpreh se veprimet e Moskës në Ukrainë synojnë të ndalojnë një “luftë” që është ndezur në Ukrainën lindore për shumë vite.

Gjatë takimit me veteranët në qytetin e tij të lindjes, ai tha se Rusia ka kërkuar prej kohësh të negociojë një zgjidhje për konfliktin në Donbas të Ukrainës, ku separatistët e mbështetur nga Moska po luftojnë me forcat ukrainase që nga viti 2014.

“Operacionet luftarake në shkallë të gjerë që përfshijnë armë të rënda, artileri, tanke dhe avionë nuk janë ndalur në Donbas që nga viti 2014.  Gjithçka që po bëjmë sot, si pjesë e operacionit special ushtarak, është një përpjekje për të ndalur këtë luftë. Ky është kuptimi i operacionit tonë mbrojtja e njerëzve që jetojnë në ato territore,” tha ai.

Duke e përshkruar lindjen e Ukrainës si “territoret historike” të Rusisë, ai tha se dërgimi i trupave në Ukrainë më 24 shkurt të vitit të kaluar ishte i nevojshëm për të mbrojtur rusishtfolësit dhe për të kryer “çmilitarizimin” dhe “denazifikimin” e Ukrainës për të parandaluar që kjo e fundit të përbënte një kërcënim për Rusinë.

Ukraina dhe perëndimi kanë hedhur poshtë objektivat e deklaruara të Putinit për çmilitarizimin dhe “denazifikimin” e vendit si pretekst për një luftë të zgjedhur dhe agresion të paprovokuar.

Bota #️Putin Lufta e Ukrainës