Ndërsa Donald Trump u largua nga Shtëpia e Bardhë dhe përshëndeti mbështetësit e tij për herë të fundit si president i SHBA-ve, aktivistja suedeze e mjedisit Greta Thunberg nuk e humbi shansin për të bërë një koment në rrjetet e saj sociale.
Teksa ka shpërndarë foton e tij, Greta e cila nuk renditet tek njerëzit e preferuar të Donald Trump, shkroi: “Ai duket si një plak shumë i lumtur që pret një të ardhme të ndritur dhe të mrekullueshme. Kaq bukur për t’u parë!”
Trump ironizoi fjalimin e Thunberg për klimën në vitin 2019, në të cilin ajo denoncoi me zemërim liderët botërorë për dështimin në ndryshimet klimatike, duke u kërkuar llogari: “Si guxoni?”
Asokohe President i SHBA, Trump tha: “Ajo duket si një vajzë e re shumë e lumtur që e pret një e ardhme e ndritur dhe e mrekullueshme. Kaq bukur për t’u parë!” Kjo ishte pikërisht ajo që Trump kishte postuar në Twitter pas fjalimit të Gretës.
Prej atëherë e deri tani, të dy shpesh janë gjetur të përfshirë në debate të ndryshme në Twitter. Greta ia ka kthyer me të njëjtën monedhë Trump çdo gjë që ai i kishte thënë. Për shembull, ajo gjeti një mënyrë për t’i kthyer këshillat që Trump i dha për tu “qetësuar”, duke i thënë atij të qetësohej gjatë numërimit të votave të zgjedhjeve presidenciale të SHBA 2020.
Gjatë zgjedhjeve, aktivistja tregoi mbështetjen e hapur për demokratin Joe Biden, duke u bërë thirrje votuesve që të votojnë në zgjedhjet presidenciale të SHBA. 17-vjeçarja suedeze shkroi në Twitter se ajo nuk merret me politika të tilla, por shtoi se zgjedhjet e ardhshme në SHBA janë mbi’ dhe përtej gjithë kësaj.
