Grupi Parlamentar i Partisë Socialiste i ka bërë një kërkesë zyrtare Kuvendit ku kërkon ngritjen e një Komisioni të Posaçëm Parlamentar për hetimin e raportit të Dick Marty. Sipas socialistëve, ky komision do të synojë mbledhjen dhe administrimin e dokumentacionit.
“Ky komision do të ketë për qëllim hetimin e krimeve në disa zona të veriut të Shqipërisë, të quajtura burgje të UÇK-së”, thuhet ndër të tjera në kërkesën që në krye mban firmën e Sekretarit të Përgjithshëm të PS, Taulant Balla dhe 17 deputetëve të tjerë.
Sipas kërkesës, në fund të punës së këtij Komisioni, Parlamenti shqiptar duhet të hartojë një projekt-rezolutë lidhur me çështjet e mësipërme.
Pak ditë më parë, në një intervistë të tijën, kreu i veteranëve të UÇK-së për zonën e Shqipërisë ka mohuar akuzat se dikur vendi ka strehuar baza të UÇK-së për të keqtrajtuar bashkëpunëtorët e Serbisë.
Fshati Cahan i rrethit të Hasit në Shqipëri pretendohet se dikur ka strehuar kampe të Ushtrisë Çlirimtare të Kosovës ku keqtrajtoheshin të dyshuarit si bashkëpunëtorë të regjimit serb.
Pretendimet që kanë për burim raportin e Këshillit të Europës të 2011-ës, u përsëritën këtë muaj në Gjykatën Speciale në Hagë ku presin gjykimin ish-presidenti i Kosovës, Hashim Thaçi, dhe ish-bashkëpjesëtarët e tjerë të UÇK-së, Kadri Veseli, Jakup Krasniqi dhe Rexhep Selimi.
