Shkruar nga Pamfleti
Një thirrje për bombë ka alarmuar aeroportin “Adem Jashari” në Prishtinë. Një pesron i paidentifikuar ka njoftuar se ka vënë një bombë në aeroport dhe kjo ka vënë në lëvizje policinë, e cila ka evakuuar të gjithë personelin dhe udhëtarët.
Kjo gjë është konfirmuar edhe nga zëdhënësja e Aeroportit Valentina Gara.
“Konfirmojmë se kemi pranuar një kërcenim me bombë. Udhëtarët dhe personeli janë evakuar. Ekipet emergjente janë involvuar në detyrat dhe përgjegjësitë e caktuara”, ka njoftuar Gara.
Policia e Kosovës nga ana tjetër tha se thirrja për bombë ka ardhur në orën 16.00
“Rreth orës 16:00 është pranuar informata për dyshimet që ndërlidhen me një shpërthim të mundshëm në Aeroportin Ndërkombëtar “Adem Jashari”. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, thuhet në njoftimin e Policisë së Kosovës.
Momentalisht policia bashkë me qen antieksploziv ka shkuar në Aeroport dhe po bën kontrolle të imtësishme. Të gjithë udhëtarët janë nxjerrë jashtë derisa të mbarojë kontrolli.
