Rektorati i Universitetit të Prishtinës “Hasan Prishtina” është vënë në alarm pasi ka pasur një sinjalizim për bombë.
Mësohet se persona të paidentifikuar kanë njoftuar se në ambientet e Rektoratit ka një bombë dhe për këtë arsye është lajmëruar menjëherë policia.
“Kemi pranuar një e-mail anonim që është vendosur një bombë dhe e kemi dërguar informacionin në polici dhe tani policia e kanë rrethuar vendin dhe janë duke e trajtuar rastin”, tha Rektori i UP-së Sahiti.
Ndërkohë ka reaguar edhe policia. Forcat e rendit rrethuan Rektoratin dhe bënë kërkime nëse ka apo jo lëndë plasëse.
“Rreth orës 16:00, është pranuar informata për dyshimet që ndërlidhen me një shpërthim të mundshëm në Rektoratin e Universitetit “Hasan Prishtina” në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen veprimeve operative të nevojshme për të menaxhuar me situatën”, thuhet në njoftimin e policisë.
Sipas burimeve, pas rreth dy orësh kërkimesh me qen anti-eksploziv, policia nuk ka rritur të gjejë lëndë plasëse. Deri më tani raportohet për alarm të rremë.
Alarmi vjen në një kohë kur në Serbi ka pasur dhjetra raste të ngjashme. Aeroporti, qendrat tregtare dhe muzetë janë evakuuar shumë herë për shkaka të alarmeve për bombë.
