Lojërat Mesdhetare “Oran 2022” që po zhvillohen në Algjeri kanë parë një ngjarje të pazakontë. Tri ditë më parë, boksieri shqiptar Alban Beqiri është tërhequr nga ringu pas 2 raundeve në peshën 69 kilogramë.
Për këtë Beqiri thotë se arbitrimi ishte i njëanshëm ndaj algjerianit dhe kundërshtarit Jugurtha Ait-Bekka, me qëllim që të kishte fitues nga vendet afrikane.
“Vendosëm së bashku me ekipin që të tërhiqesha pas raundit të dytë për arsye të padrejtësisë që po bëhej në gjykimin e ndeshjes. Të ishte për mua personalisht, nuk doja të ndodhte kjo, pasi unë kur jam në ring, nuk e kam mendjen te gjykimi, por më vonë reflektova dhe kuptova që po lodhesha kot.
Ndeshja shkoi shumë mire, siç mund ta shikoni deri në raundin e dytë dhe isha shumë para me goditjet, por pikët, gjyqtarja ia jepte kundërshtarit duke qenë se gjyqtarët ishin afrikanë. Prandaj ne vendosëm që të mos ua jepnim atë kënaqësi që të merrnin një fitore të pamerituar dhe në mënyrë të shëmtuar. Kjo gjë ndodhi edhe me boksierë dhe sportistë të tjerë, jo vetëm me mua. Ishte një eveniment me qëllime të qarta për t’i nxjerrë fituese vendet e Afrikës.
Unë kisha një fitore të sigurt kundrejt tij, por për ata mjaftonte që boksieri i tyre të ishte në këmbë dhe të fitonte. Stafi ynë e pa që po shkonte mundimi dëm dhe morëm këtë vendim. Më vonë u bë një mbledhje me asamblenë e boksit dhe na kërkuan falje ne sportistëve për gjykimin. Kjo ndodhi pasi nuk kishte asnjë gjyqtar europian, por të gjithë ishin nga vendet afrikane dhe favorizonin sportistët e tyre”, shkruan Beqiri.
