Ish-Kryeministri Sali Berisha, tashmë i injoruar totalisht nga perëndimi, duket se sheh deklaratat nga rrjetet sociale si të vetmen mundësi arratisje nga “izolimi”.
Ditën e sotme Berisha, me anë të një postimi ka përshëndetur mbledhjen e samitit të NATO-s duke e cilësuar si historik, ndërsa thekson se heqja e vetos nga ana e Turqisë dhe pranimi i Suedisë e Finlandës, ka rëndësi të madhe strategjike.
“Samit Historik! Të dashur miq, sot liderët e vendeve anëtare të Aleancës së Atlantikut të Veriut mblidhen në një Samit vërtet historik për këtë Aleancë. Në këtë Samit, pas heqjes së vetos nga ana e Turqisë, Suedia dhe Finlanda pranohen anëtare me të drejta të plota të Aleancës. Anëtarësimi i këtyre dy vendeve në NATO ka rëndësi të madhe strategjike. Ai e bënë gadishullin skandinav dhe vetë Aleancën më të sigurte se kurrë nga rreziku rus dhe çdo rrezik tjetër”, shkruan Berisha.
Ish kryeministri e mbyll postimin e tij me një urim për NATO-n, duke thënë se uron që nën udhëheqjen e SHBA-ve të shndërrohet në Aleancë globale të vendeve të lira për mbrojtjen e paqes, lirisë, demokracisë në botë.
“Le të urojmë gjithashtu të dashur miq që NATO, Aleanca më e fuqishme politiko-ushtarake e lirisë të të gjitha kohërave, nën udhëheqjen e SHBA-ve të shndërrohet në Aleancë globale të vendeve të lira për mbrojtjen e paqes, lirisë, demokracisë në botë”, përfundoi Berisha.
