Kryeministri Edi Rama ka deklaruar ditën e sotme se mbi gjurmën e aerodromit të vjetër në Vlorë do të ngrihet aeroporti i ri ndërkombëtar i Vlorës. Në ceremoninë e nisjes së punimeve, Rama tha se gjithë ajo vonesë, gjithë ai stres për të cilin vlonjatët kontribuuan me gjithë ato përqeshjet e tyre karakteristike dhe romuzet e tyre tradicionale u kthye në mirësi sepse sot jemi këtu dhe me një aleancë fantastike për të ardhmen e aeroportit, që është aleanca me aeroportin e Mynihut.
“Gjithë shqiptarëve kudo ku janë, në Shqipëri, në Kosovë, në të gjitha territoret ku shqiptarët banojnë në këtë rajon dhe në të gjithë botën ku ata janë spostuar e sidoqoftë mbeten me zemrën që u rreh për Shqipërinë, për flamurin kuq e zi të Gjergj Kastriotit dhe të Ismail Qemalit.
Vlora ka historinë e saj sa i përket transportit ajror. Këtu është krijuar shkolla e parë e aviacionit dhe këtu ku ndodhemi është ndërtuar dhe aerodromi që në vitin 1920, i cili përdorej për arsye ushtarake. Mbi këtë gjurmë të aerodromit të vjetër, ne sot fillojmë një histori të re, së bashku me një mik të mirë, një ndër më të shquarit e sipërmarrjes shqiptare, një personalitet që me veprat e tij e ka çuar mërin në shumë vende të botës dhe çmohet prej shumë popujve e prej shumë njerëzve për veprat që ka bërë. Një njeri që kam nderin ka konsideroj dhe mikun tim, bacën Bexhet, që e falënderoj shumë për përfshirjen në këtë aventurë të përbashkët sepse për hir të së vërtetës në të gjitha punët që kemi bërë, kjo për të ardhur në këtë punë, qëlloi më e vështira.
Nuk ishte aspak e thënë që ky proces të shkonte fjollë siç do ta kishim dëshiruar, u nis dhe u pengua disa herë për arsye objektive që nuk kishin lidhje me ne, sepse veprat publike i kanë dhe këto të papritura dhe për dreq na u fut në mes dhe pandemia, e cila më shumë se çdo sektor tjetër, goditi sektorin e aviacionit.
Ne nuk reshtëm së bëri përpjekjet deri sa gjërat erdhën aty ku duhet dhe u bë e mundur forca e duhur për ta çuar përpara këtë projekt të madh. Gjithë ajo vonesë, gjithë ai stres për të cilin vlonjatët kontribuuan me gjithë ato përqeshjet e tyre karakteristike dhe romuzet e tyre tradicionale u kthye në mirësi sepse sot jemi këtu dhe me një aleancë fantastike për të ardhmen e aeroportit, që është aleanca me aeroportin e Mynihut, një nga fuqitë më të mëdha të transportit ajror jo vetëm në Europë, por edhe në botë. Përfaqësuesit janë këtu me ne, kanë nisur ta shoqërojnë projektin e zbatimit që në hapat e parë dhe të gatshëm për të marrë operimin e aeroportit të Vlorës”, tha Rama.
“Aeroportet janë si klane familjare në një farë mënyre. Nuk mjafton që të ndërtosh një infrastrukturë të bukur, apo të kesh një pistë, e cila këtu do të jetë 3.2 km dhe do të vërë në funksion kapacitetin dhe për fluturime të drejtpërdrejt transoqeanike, por duhet të kesh aleanca dhe sinergji dhe me aeroporte të tjera, për të krijuar një sistem ku strukturat aeroportuale mbështesin dhe plotësojnë njëra-tjetrën. Ky aeroport bëhet porta e tretë ndër 4 porta qielli që duam të hapim, pas atij të Tiranës dhe të Kukësit, para se të nisë puna dhe për aeroportin e katërt sezonal të Sarandës që do të funksionojë drejtpërdrejt dhe në mbështetje të sezonit.
E gjithë logjika e industrisë botërore të turizmit është se për të pasur jo vetëm sasi, por edhe cilësi në prurjet e turistëve, dhe për të synuar jo vetëm masë turistësh, por edhe atë në nivel shpenzimesh, përcjell kategorinë A të turistëve, ata që shpenzojnë më shumë me pushim, është domosdoshme që pika e mbërritjes në vendpushim të mos jetë më shumë se 45 minuta, ose maksimumi 1 orë nga pika e zbritjes në vend. Kjo është arsyeja që na duhen 4 aeroporte në vend në këtë fazë. Ndoshta në një fazë tjetër do na duhen dhe më shumë”, u shpreh kryeministri.
Rama cilësoi se për ata që pyesin pse na duhen kaq shumë aeroporte, duhet të informohen se numri i aeroporteve lidhet me kapacitetin e aksesueshmërisë që iu jep atyre që vijnë.
“Nga ana tjetër duhet të informohen për faktin që aeroportet nuk janë as parkingje makinash, as stacione ku vijnë njerëz që thjesht kryejnë nevojat e tyre për transport. janë motor i jashtëzakonshëm zhvillimi ekonomik, social dhe faktor progresi në vend.
Ata që kanë avazin, popullsi s’ka bukë, ç’na duhen aeroportet, duhet t’ia them se çështja e bukës është çështje që shqiptarët nuk e kanë pasur asnjëherë problem, Por aeroportet janë fabrika buke sepse rrisin të ardhurat e vendit. Sjellin konsumatorë në vend. Sa më shumë njerëz vijnë, aq më shumë vendi ka mundësi të rrisë shërbimet. Sa më shumë rrit shërbimet, aq më shumë rrit prodhimet. Turistët që vijnë janë konsumatorë.
Nuk duhet të shqetësohemi kur ndërtohen aeroporte, porte sepse të gjitha këto janë motorë të ekonomisë. Rrisin fuqinë motorike të ekonomisë sonë. Me fillimin e kësaj pune dhe fillimin në Sarandë, vendosim një sistem të ri motorësh për ekonominë”, ka deklaruar Rama.
