Politike 5 Maj 2022, 11:40

Alibeaj mbledh sot grupin e PD, “Rithemelimi”: Është nul, qëndrimin për presidentin e vendos Këshilli Kombëtar

Shkruar nga Pamfleti
Alibeaj mbledh sot grupin e PD, “Rithemelimi”: Është nul,

Grupi Parlamentar i PD do të mblidhet ditën e sotme në orën 17:00, për të diskutuar për negociatat me PS për presidentin.

Enkelejd Alibeaj ka njoftuar se mbledhja do të zhvillohet ditën në selinë blu, mbledhje kjo e para pasi u vendos shkarkimi i tij.

Lidhur me këtë ka reaguar edhe deputeti i PD-së, Luçiano Boçi.

Boçi thotë se kjo mbledhje është nul për shkak se Alibeaj është shkarkuar nga posti i kreut të grupit parlamentar të PD.Ai shton se mbledhjen e grupit e thërret kryesia dhe jo një deputet i njohur nga Rama si përfaqësues grupi.

Deklarata e Boçit:

Lidhur me mbledhjen e grupit parlamentar, të thirrur sot nga zoti Alibeaj, në cilësinë e nënkryetarit të grupit deklaroj se ajo është nul.

Është nul për dy arsye:

Së pari:

Zoti Alibeaj ka tagrin e Ramës dhe të Ballës, por nuk ka tagrin e demokratëve te cilët e kanë shkarkuar atë në Kuvendin e datës 30 Prill.

Së dyti mbledhjen e grupit e thërret Kryesia e Grupit dhe jo një deputet, qoftë ai i njohur nga Rama si përfaqësues grupi.

Prandaj nga ky moment kërkoj në ditët në vazhdim thirrjen e mbledhjes së Kryesisë së Grupit, për të diskutuar e vendosur për mbledhjen e Grupit Parlamentar.

Grupi parlamentar i PD nuk mund të mblidhet sa herë e kërkon e kur e kërkon Rama-Balla.

Ne nuk mund të shkojmë pas qerres së Ramës çfarëdolloj pamje të ketë ajo.

Këtu nuk bëhet fjalë për bojkot.

Koha e bojkotit dhe e pazareve ka perënduar.

Qëndrimin politik në raport me çështjen e zgjedhjes së Presidentit e vendos Këshilli Kombëtar, si organi më i lartë vendimarrës politik pas Kuvendit dhe e pasqyron në qëndrim Grupi Parlamentar.

Kjo është rruga statutore e funksionimit të Partisë Demokratike.

Politike