Kreu i PDIU-së, Vangjel Dule ka kritikuar ashpër vendimin e qeverisë për ndërtimin e Portit të Durrësit, duke theksuar se ata po nëpërkëmbin ligjin. Ndërsa i kujton edhe njëherë mazhorancës se jetojmë në një republikë parlamentare, jo monarki, Dule vë në pa rëndësinë e Projektit të Durrësit. Sipas kreut të PDIU-së, ky projekti më i madh financiar në vend nuk mund të kalojë me procedurë të përshpejtuar.
Dule thekson se tërheqja pas e Bashkimit Evropian për financimin e Portit të Durrësit, është sinjal i qartë se diçka nuk shkon.
“Nuk do ta besoja kurrë se do të ketë kurrë një parlamentar që do të jetë kundër projektit. Jam pro forcimit të marrëdhënieve politike me emiratet e bashkuara, po këto janë monarki, ne jemi republikë parlamentare. Vendimet i marrin monarkët, në demokraci institucionet e përcaktuara nga ligji. Përse e theksoj këtë gjë? Se ne jemi duke vendosur me procedurë të përshpejtuar për projektin më të madh financiar të realizuar ndonjëherë. Ky është më i rëndësishëm se projekti i buxhetit të shtetit.
Në vendin tonë qeveria nuk ka frikë nga ligji, e nëpërkëmb. E kuptoni se ku është rënia e së keqes. Ne festuam, ngritëm për të mos ulur kurrë flamurin e BE në parlamentin tonë, brenda dhe jashtë. Insistova se duhet të ndihemi e veprojmë si Europianë. Çfarë ndodhi? BE anulon 28 mln nga fondi i kreditimit për portin e Durrësit. Pse ndodhi? A mund të na japë njeri shpjegime? Ishte sinjal? Po krijoni një trekëndësh konfliktual me BE. Porti i Durrësit-Vizat e Arta-Amnistia Fiskale. Ju që keni përgjegjësinë 10 vjeçare të procesit të integrimit. Nuk e keni kuptuar se e drejta europiane është e drejta e Shqipërisë. Apo mos vallë dhe këto janë të ndërlidhura me njëra tjetrën“- tha Dule.
