Armando Broja përfundon në radarët e sheikëve të Njukasëllit. Sulmuesi shqiptar ka ende të paqartë të ardhmen e tij me Çelsin, sidomos pas ndryshimit të pronësisë, e kështu, shumë klube janë vënë në garë për të siguruar shërbimet e futbollistit të talentuar.
Në mediat britanike kanë qarkulluar shumë emra skuadrash të gatshme që të hedhin hapin për futbollistin në merkaton e verës, me Uest Hemin e Brajtonin, që duan ta huazojnë, apo Sauthemptonin, që kërkon të bëjë përfundimtar transferimin e tij, pas një edicioni mjaft të suksesshëm në radhët e tij si i huazuar.
Por në Angli bëjnë të ditur se Njukasëlli ka dërguar skautë që të ndjekin Brojën në stadium në paraqitjet e fundit, e kjo do të thotë se po përgatitet që të bëjë një hap konkret për firmën e tij. Sigurisht, me forcën financiare të Njukasëllit, që sponsorizohet nga sheikët e Arabisë Saudite, një tentativë e këtij klubi për Brojën do të largonte pjesën më të madhe të konkurrencës për futbollistin. Por mbetet të shihet qeëndrimi i Çelsit apo edhe vetë lojtarit, i cili me siguri nuk dëshiron të kalojë në një skuadër ku nuk i garantohet se do të luajë rregullisht.
