Ish-kreu i Aleancës Kuq e Zi, Kreshnik Spahiu ka vijuar me komentet në rrjetet sociale sa i takon konfliktit të ish-kryeministrit Sali Berisha me SHBA. Duke u ndalur te debati për nisjen ose jo të hetimeve ndaj tij, Spahiu ka treguar shembujt që vijnë nga shtet e rajonit.
“Ish-kryeministri maqedonas u dënua për një Mercedes. Ish-kryeministri rumun për një vetratë alumini. Ish-kryeministri kroat për një rrugë. Ish-kryeministri bullgar për një donacion. Ju i kërkoni prova Amerikës për këta që kanë vjedh gjithë tokën, nëntokën, detin dhe qiellin e Shqipërisë. Pafytyrësi dhe mungesë integriteti kolektiv”, shkruan ai.
Më tej Spahiu ka pasur debate dhe me disa komentues, që e kanë kritikuar për qëndrimet ndaj PD. Ata i kanë kujtuar se dikur ishte në aleancë me ta.
“Unë kam mbetur ai që isha në çadër, ndërsa ju keni ndryshuar. – Ju braktiset çadrën dhe hytë me Ramën në qeverisje; – Ju braktiset çadrën dhe tradhtuat kuqezinjtë; – Ju braktiset çadrën dhe bëtë koalicion me LSI; – Ju braktiset çadrën dhe shitet zgjedhjet; – Ju braktiset çadrën dhe i shpallet lufte Amerikës; – Ju braktiset çdo kauze dhe u bëtë ithtarë qorra të pazareve Lulzim Bashës me Ramën. Unë jam ende tek çadra. Ju keni vite që e keni shitur shpirtin majtas dhe jeni masha e pushtetit, por ti e ke të vështirë ta kuptosh. Lexoje disa here mesazhin tim se nuk është aspak personal për ty, por për ju që tradhtuat kauzën dhe idealet. Unë ende jam në çadër, ndërsa ju jo. Ruaje këtë mesazh deri në 2025 ditën kur Berisha do dali dhe do thotë: “Amerika dhe Rama na vodhën votat”. Do jetë shumë vonë për ju, sepse do ju duhet të korrni ato çka po mbillni prej vitesh: ‘Pabesinë tuaj’”, tha ai.
