Ndahet nga jeta në moshën 63-vjeçare violinistja Ruska Ruçi- Piraniqi, e njohur si pjestare e orkestrës filarmonike të Shkodrës.
Vdekja e violinistes nga Shkodra ka pikëlluar shumë kolegë të saj.
Qyteti ka humbur një nga artistet që me punën e saj të palodhur dhe me përkushtim të plotë la gjurmë në jetën artistike të Shkodrës, por jo vetëm.
Për kolegët dhe të afërmit violinistja gjatë gjithë jetës së saj ka rrezatuar mirësi dhe pozitivitet si në profesion ashtu edhe në jetën private.
Violinistja Ruska Ruci-Piraniqi lindi në Shkodër, ndërsa mbaroi Shkollën e Muzikës, e më pas Liceun Artistik në Tiranë.
Ruska Ruçi ka qenë pjesë për shumë vite në orkestren filarmonike të Shkodrës, deri në vitin 1998.
Më pas ajo u zhvendos në Itali ku nuk u ndal në punën e saj si instrumentiste.
Ruska Ruci-Piraniqi ka dhënë kontributin e saj në arsim por edhe në vatrat kulturore.
