Një shpërthim me lëndë plasëse ka ndodhur në orët e para të mëngjesit në Tiranë.
Një makinë në lëvizje, është hedhur në erë me lëndë plasëse, e për pasojë dy persona kanë mbetur të plagosur. Shpërthimi ka ndodhur gjatë orëve të natës në një mjet të llojit “Mazda”, në zonën e Unazës së Re, afër rrethrrotullimit të Selitës, rreth orës 02:50.
Policia njofton se lënda plasëse ka shpërthyer në një mjet në lëvizje i cili drejtohej nga shtetasi Mikel Harizaj 42 vjec.
Në makinë ndodhej pasagjer edhe shtetasi Serini Dumi 26 vjeç. Si pasojë e shpërthimit janë dëmtuar drejtuesi i mjetit dhe pasagjeri, të cilët ndodhen në spital për ndihmë mjekësore.
42-vjeçari Harizaj rezulton me precedentë kriminalë. Në vitin 2009, Mikel Harizaj ka plagosur me granatë tre persona, pas sherrit me to në ambientet e një lokali, në Selenicë të Vlorës.
Nga raportimet e policisë në atë kohë, pas sherrit Harizaj kishte dalë nga lokali dhe kishte shkuar te makina e tij, që e kishte të parkuar afër lokalit, prej ku kishte marrë një granatë dore, me të cilën kishte sulmuar shtetasit Ervis Alushi, Gentian Abazi dhe Edison Ademi.
Nga shpërthimi i granatës kishte mbetur i plagosur i rëndë njëri prej tyre, ndërsa dy të tjerët kishin marrë plagë më të lehta. Për ngjarjen, Mikel Harizaj ishte arrestuar më vonë nga policia dhe u akuzua për vrasje të mbetur në tentativë.
Tiranë/Informacion paraprak
Më datë 07.01.2022, rreth orës 02:50 të mëngjesit, në Unazën e Re, në afërsi të rrethit të Selitës, në rrethana ende të paqarta ka shpërthyer dyshohet lëndë plasëse në mjetin në lëvizje, me drejtues shtetasin M. H., 42 vjeç dhe pasagjer shtetasin S. D., 26 vjeç.
Si pasojë e shpërthimit janë dëmtuar drejtuesi i mjetit dhe pasagjeri, të cilët ndodhen në spital për ndihmë mjekësore.
Grupi hetimor nën drejtimin e Prokurorisë po punon për sqarimin e rrethanave të ngjarjes.
