Më 2013-ën, premtoi luftën kundër krimit ushqimor, por bëri deputet xhambazin Vullnet Sinaj, bosin e “Big Market” që po shet ushqime të skaduara; ndërsa sot, Rama sillet e justifikohet sikur ka vetëm 8 muaj në pushtet, por ka 8 vite e nuk ka zgjidhur as 8 hallet kryesore social-ekonomike që premtoi: Legalizimet, pronat, ujin 24 orë, uljen e borxhit, eleminimin e bandave kriminale të lidhura me mafien politike, heqjen e TVSH për ujë e energji dhe luftën kundër korrupsionit, pazaret me oligarkët e shëndetësinë falas
Gjatë fjalimit para drejtorëve e zyrtarëve të “Rilindjes” në Vlorë, Rama e përsëriti 25 herë, lutjen për mandatin e tretë, duke deklaruar se nuk e do për pushtetin për vete e për Gjiknurin, Beqjen, “Tigrin” etj., por vetëm për të zgjidhur hallet e popullit.
Nuk mund të besohet kjo “përrallë”, sepse u provua pas mandatit të parë, kur Ramës iu dha pushteti më 2013-ën, ngaqë bëri 30 premtime sociale-ekonomike bazike për jetën dhe integrimin e shqiptarëve, por nuk realizoi asnjë.
Shqiptarët e ri-besuan “përrallën” e Ramës, edhe në vitin 2017 kur i dhanë mandatin e dytë; me justifikimin se donte “timonin” vetëm pa LSI-n, që të luftonte korrupsionin, të pastronte administratën nga hajdutët e kriminelët, të rriste punësimin dhe nivelin e jetesës.
Tashmë pas afro 8 vitesh pushtet, Rama po kërkon mandatin e tretë, me po të njëjtat justifikime e premtime e me të njëjtët hajdutë; veçse duke thënë, se nuk e do pushtetin për vete, për Damianin, “Tigrin”, Taulantin etj,, por për të zgjidhur çështjet jetike të shqitarëve.
Përditë, Rama del e thotë: – “Janë bërë edhe gabime e ka mangësi, por mandati i tretë, do jetë “mrekulli” ekonomike, prandaj duhet ta vazhdojmë pushtetin, sepse vetëm partia jonë është parti që mendon e punon për popullin”; tipik si Ramiz Alia në vitin 1990; kur me Shqipëri të zhytur në krizë, deklaronte se vetëm PPSH mendonte e punonte për popullin.
Me fjalimin në Vlorë, Rama u soll sikur ka vetëm 8 muaj në pushtet e jo 8 vite; dhe po sillet sikur ka 4 muaj e jo 4 vite me pushtet absolut personal; gjatë të cilave ka shtuar edhe më tepër problemet sociale, ka thelluar më tepër falimentin në buxhet dhe kolapsin në ekonomi.
Në vitin 2013, bëri 30 premtime të forta e të bujshme, por sot pas dy mandatesh sundim, megjithëse ka marrë 13 miliardë Euro borxhe jashtë e brenda Shqipërisë; nuk ka relizuar asnjë nga 8 premtimet bazë sociale-ekonomike:
– Premtoi, se brenda mandatit të parë, do bënte mbylljen 100% të procesit të legalizimeve e dhënies fund të ndërtimeve pa leje; por ende 70% janë pa legalizuar, ndërkohë që në 6 vitet e fundit, me lejen e kupolës së pushtetit, janë shtuar edhe 83 mijë ndërtime të tjera pa leje.
– Premtoi, se brenda mandatit të parë, do zgjidhte përfundimisht çështjen e kthim-kompensimit të pronave; por sot në fund të mandatit të dytë, 80% e dosjeve pronësore janë ende të pa zgjidhura.
– Premtoi, se brenda mandatit të parë, do garantonte furnizim me ujë 24 orë në të gjithë territorin e Shqipërisë; por sot në fund të mandatit të dytë, në 48 qytete ka ujë 2 herë në ditë nga 2 orë; ndërsa në 272 komuna nga 308 të tilla, nuk ka ujë fare.
– Premtoi, se do garantonte uljen e borxhit, nga 62% më 2013, në 58% brenda mandatit të parë, por sot, borxhi legal i kalon 70%, ndërsa borxhi i fshehur është 1.8 miliardë Euro.
– Premtoi eleminimin e bandave kriminale të lidhura me politikën, por i futi në parlament e qeveri, ndërsa eksponentët po i nxjerr nga burgu e po u jep tendera, leje ndërtimi e pasuri publike.
– Premtoi se brenda 100 ditëve të para të mandatit të parë, do largonte oligarkët e PD nga fondet publike e do t’i sekuestronte; por i bëri pjesë të qeverisjes e madje shtoi dhe 10 oligarkë të rinj të klanit të tij; duke u dhënë 95% të tenderëve, licensave, pasurive publike, koncesioneve e PPP-ve.
– Premtoi se brenda 6 muajve të parë të mandatit të parë, do hiqte 20% TVSH të ujit, energjisë elektrike e ushqimeve; dhe do zhdukte krimin ushqimor në rrjetet e supermarketeve, por bosin kryesor Vullnet Sinaj të krimit ushqimor “Big Market” e bëri deputet.
– Premtoi shëndetësi falas në spitale për gjithë popullatën; dhe rimbursim 100% të ilaçeve e pajisjeve ndihmëse mjekësore për të sëmurët kronikë, por ende pacientët në spitale i blejnë medikamentet, ndërsa rimbursimi i recetave është 25%-30% e vetëm për ilaçet me çmim të ulët.
Dosja e mashtrimeve, dështimeve e zullumeve në këto 8 vite, të krijon bindjen e plotë, se Rama e kërkon mandatin e tretë, për të mbrojtur dhe “pastruar pisllëqet” e 2 mandateve të para.
Këtë synim e dëshmoi, vetë, me sjelljet çmendurake në TV-Klan për landfillet, ku me histerizëm e kërcënime ndaj medias e drejtësisë, mbrojti krimin me landfillet dhe përfituesit, Klodian Zoto, Mirel Mërtiri Stela Gugallja e Ilir Dedja, të cilët i dirigjon ministër “Tigri”./Pamfleti
