Einar, njëri ndër reperët më të famshëm në Suedi, është qëlluar për vdekje në natën e së enjtes në Stokholm, duke nxitur reagime të shumta rreth dhunës së shkaktuar nga bandat e viteve të fundit në shtetin suedez.
Reperi 19-vjeçar, emri i vërtetë i të cilit është Nils Gronberg, u vra në periferi të Stokholmit dhe policia nuk ka arrestuar ndonjë person deri më tani.
Në një incident tjetër vitin e kaluar, ky reper ishte rrëmbyer dhe sulmuar nga reperët rivalë.
“Një jetë e re është shuar dhe unë e kuptoj se ai ka pasur shumë peshë për shumë të rinj. Është tragjike”, tha Kryeministri i Suedisë, Stefan Lofven.
Policia është në kërkim të të paktën dy të dyshuarve që dyshohet se kanë qëlluar reperin.
Motivi i të shtënave mbetet i paqartë, por gazeta suedeze Aftonbladet raportoi se reperi kishte marrë disa kërcënime së fundmi.
Ai u vlerësua me çmimin për këngën e vitit 2019 dhe çmimin e të sapoardhurit të vitit një vit më pas. Këngët e Einar janë shkarkuar qindra mijëra herë në Spotify.
Udhëheqësja e partisë Demokristiane Ebba Busch postoi në Twitter se nëse politikanët nuk marrin përgjegjësinë për t’u marrë me krimin e lidhur me bandat, “ne nuk mund të mbrojmë dinjitetin njerëzor ose sigurinë në vend”.
