Kreu i Bashkisë së Kamzës Rakip Suli ka çuar në SPAK paraardhësin e tij Xhelal Mziu, nën akuzën e shpërdorimit të detyrës.
Akuza e Sulit lidhet me një leje ndërtimi që Mziu ka dhënë në zonën e Laknasit, për ndërtimin e një thertoreje që është kundërshtuar prej muajsh të tërë nga banorët e zonës.
Ky vendim për ta paditur Mziun me akuzën e shpërdorimit të detyrës vjen, pasi ky i fundit është propozuar nga kreu i PD-së Lulzim Basha për të qenë drejtues politik i demokratëve në Dibër.
Xhelal Mziu nuk kandidoi në zgjedhjet e fundit lokale për Bashkinë e Kamzës, duke bërë që Suli ta kishte të sigurt fitoren në bastionin historik të demokratëve.
Rakip Suli u zgjodh kryebashkiak në zgjedhjet e 30 qershorit, ku ishte kandidat i vetëm në këtë garë. Xhelal Mziu ka drejtuar Bashkinë e Kamzës për 3 mandate rradhazi që prej vitit 2007.
