Ilir Meta është dakord për bashkëpunim me Berishën, por me një kusht. Referendumet.
Për “Të Paekspozuarit”, Meta ka deklaruar se bashkëpunimi i tij me Sali Berishën varet nga raporti i ish-kryeministrit me referendumet.
“I merakosur” për fatin e vendit, Meta tha se qëllimi i tij është që Shqipërinë ta marrin në dorë shqiptarët dhe ata të kenë të drejtë të zgjedhin përmes referendumeve.
“Bashkëpunimi im me Sali Berishën do te varet nga raporti i tij me referendumet. Unë jam për ti dhënë fuqi popullit njëherë e përgjithmonë.
Unë përgjegjësitë e mia i kam marrë hapur për të gjitha aktet që kam bërë dhe do t’i marr pas 25 korrikut. Qëllimi është që Shqipërinë ta kenë në dorë shqiptarët. Shqiptarët mund ta kenë në dorë vetëm kur të kenë të drejtën e referendumit pa pengesa.
Atëherë klasa politike është në kontrollin e tyre, nuk guxojnë të bëjnë ligje kundër tyre dhe do të jenë të detyruar të japin llogari ndaj tyre.
Referendumi nuk është fillimi, referendumi është qëllimi i garantimi i sistemit demokratik për të ardhmen. Ka shumë interesa që të mos ketë referendum”, u shpreh Meta.
