Ditën e sotme ka nisur puna për realizimin e projektit për modernizimin e bazës ajrore në Kuçovë, e cila do të kthehet në një bazë ajrore të NATO-s.
Ministri i Mbrojtjes Niko Peleshi tha gjatë fjalës së tij në ceremoninë e organizuar, se përzgjedhja e Shqipërisë për këtë bazë është një mundësi për të marrë më shumë përgjegjësi ndërsa theksoi se nuk do ishin këtu pa ndihmën e aleatëve. Ai shtoi se është një mesazh për aktorë me qëllime rivale në rajonin e Ballkanit Perëndimor.
“Jemi gati të vendosim gurin e themelit për fillimin e punimeve. Nuk do ishim këtu pa ndihmën e aleatëve tonë. Ky projekt mori jetë tre vite më parë kur morën zyrtarisht lajmin për këtë projekt. Është një dëshmi e qartë për aftësitë e konsoliduara për të marrë më shumë përgjegjësi, por po ashtu një mesazh për aktorë me qëllime rivale në rajonin e Ballkanit Perëndimor. Forcon qëndrimin tonë drejt SHBA-ve dhe BE-se. Një ngjarje e rëndësishme për Shqipërinë, e cila konfirmon prezencën e NATO në vendin tonë. Do të ketë një impakt të rëndësishëm dhe bashkëpunim të drejtpërdrejtë të vendeve tona dhe aleatëve”, tha Ministri i Mbrojtjes, Niko Peleshi.
