Bashkimi Europian i ka mbyllur derën Serbisë pas rreshtimit të saj në krah të Moskës. Sot, ministrat e Jashtëm të BE janë mbledhur në një takim dhe në fokus ka qenë Ballkani. Sipas një dokumenti që është diskutuar mes tyre, shtetet në rajon që kanë ndjekur politikat e BE sa i takon masave ndaj Rusisë, do kenë më shumë angazhim në bllokun evropian.
Sipas këtij dokumenti, përfaqësuesit e Shqipërisë, Malit të Zi dhe Maqedonisë së Veriut mund të ftohen të marrin pjesë në takimet e zgjedhura të Këshillit të BE-së dhe organeve përgatitore të politikës së jashtme.
Një pjesë e madhe e diskutimeve është vendosur te Serbia. Kjo e fundit nuk ka vendosur sanksione ndaj Rusisë dhe disa prej të pranishmëve e kanë bërë të qartë se nuk mund të ketë lojë me dy porta. Ata kanë ranë dakord që t’i kërkojnë Serbisë që të ndërmarrë sanksione njësoj si vendet e BE. Përveç Hungarisë, të gjitha shtetet kanë qenë në unison sa i takon kërkesës për Serbinë.
Pas takimit foli edhe Përfaqësuesi i lartë për politikën e jashtme dhe të sigurisë së Bashkimit Europian, Josep Borrell. Ai ishte i ashpër me Serbinë. “Për mua ashtu si dhe shumë ministra të Jashtëm është e qartë, se të mbash lidhje të ngushta me regjimin e Putinit nuk përputhet më me ndërtimin e një të ardhme të përbashkët europiane. Të dyja gjërat njëkohësisht nuk përputhen me njëra tjetrën. Të qenit neutral sot në raport me luftën në Ukrainë është koncept fals. Një vend ka pushtuar tjetrin. Duke i vendosur të dyja vendet në të njëjtën nivel, kjo zbeh diferencën mes sulmuesit dhe të sulmuarit. Kjo nuk është e mundur”, tha ai.
Borrel u shpreh se BE i di vështirësitë, por Serbia duhet që të vendosë sanksione sa më shpejt.
