Shkruar nga Pamfleti
Janë rrahur me sende të forta në banesën e tyre një çift në fshatin Gjeroven të Njësisë Administrative Velabisht, në Berat.
Tre persona kanë shkuar për të sqaruar një çështje me të zotin e shtëpisë Festim Selika dhe më pas kanë përfunduar duke e rrahur atë dhe bashkëshorten e tij Elida Selika, në sy të fëmijëve të tyre të mitur 4 dhe 3 vjeç.
Pak përpara se tre personat të shkonin në banesën e familjes Selika, e kanë parë kryefamiljarin Festim Selika duke pirë kafe në një lokal në fshatin Velabisht me nipin e tij, me të cilin ata kanë pasur një konflikt të mëparshëm. Duket se kjo kafe ka qenë edhe sebepi i sherrit që ka ndodhur në banesën e çiftit Selika.
Në debat e sipër ata kanë qëlluar disa herë në kokë Festimin, i cili ka rënë pa ndjenja. Pasi ka ndërhyrë gruaja e tij, Elida ata e kanë goditur edhe atë me gur në kokë dhe pasi e kanë përplasur disa herë në mur, e kanë qëlluar me shkelma e grushta në trup.
Pasi 3 agresorët janë larguar, Elida ka njoftuar policinë dhe çifti është dërguar me hematoma të shumta në Spitalin Rajonal të Beratit. Gruaja ka marrë 3 çarje të thella në kokë dhe plagë të shumta në trup,ndërkohë që bashkëshorti i saj është në gjendje më të mirë shëndetësore. Duke treguar të gjithë ngjarjen që terrorizoi edhe 2 fëmijët e tyre, çifti Selika kërkon nga shteti që përgjegjësit e këtij agresioni të vihen përballë drejtësisë, pasi ata pohojnë se agresorët e tyre nuk janë arrestuar dhe kjo i bën të ndihen më të kërcënuar për jetën.
Mjeku kirurg në Spitalin Rajonal të Beratit, Piro Leka, ka konfirmuar se çifti ka shenja dhune në trup, por më e dëmtuara nga goditjet e marra është gruaja Elida, e cila ka marrë goditje të rënda në kokë e në trup.
Në lidhje me këtë ngjarje, burimet zyrtare të Drejtorisë së Policisë së Qarkut Berat konfirmojnë per Tch se një nga agresorët është arrestuar dhe dy të tjerët po hetohen në gjendje të lirë.
