Deputetja e Patisë Demokratike, Jorida Tabaku nuk i ka kursyer ironinë teksa ka komentuar zhvillimet në kuadër të samitit të BE-së në Bruksel.
Teksa ka gjetur kohë të falënderoj familjen e forcave demokrate PPE për angazhimin për të zgjidhur ngërçin e krijuar me veton e Bullgarisë, Tabaku tha se kryeministri Edi Rama “shkoi me një këmbë, si çeço” në samit, pas paralajmërimit të tij se s’do merrte pjesë.
“Bëri të fortin e lagjes duke mbledhur edhe trimat rreth e rrotull të vendeve te rajonit por megjithatë shkoi në konferencë. Ashtu siç e thashë para pak ditësh me një këmbë shkoi Rama atje në konferencë, si çeço pavarësisht se bëri të fortin e lagjes duke mbledhur edhe trimat rreth e rrotull të vendeve te rajonit, shkoi”, tha Tabaku.
Ndërkohë, kryetarja e Kuvendit Lindita Nikolla ia mbylli mikrofonin, duke iu drejtuar me fjalët: “Nuk është procedurë, ju dëgjuam.”
Më pas fjalën e mori ministrja Spiropali.
Ministrja e Shtetit për Marrëdhëniet me Parlamentin iu drejtua Tabakut duke thënë se dy ditë më parë opozita e konsideronte kryeministrin “tradhtar dhe vëlla të Vuçiç”, ndërsa sot thonë ishin ata që e detyruan të shkonin atje.
Megjithatë sipas ministres, kryeministri ka punë mjaftueshëm në Samitin e BE-së dhe s’ka kohë të merret me garën e brendshme të BE.
“Këtë garë që e keni me njëri-tjetrin doni ta transferoni tek ne dhe kusuri ynë të vijmë këtu dhe t’ju përgjigjemi ju, doni edhe kryeministrin madje t’ju përgjigjet, se nuk ka punë mjaftueshëm në samitin e BE-së, ku sipas zukatjeve të Joridës paska vajtur me një këmbë, se para dy ditësh thoshit nuk do të shkojë, tradhtari, vëllai i Vuçiçt. Kur kryeministri deklaroi se po shkonte thatë: e detyruam ne se ju s’dini ç’thoni, shumë e thjeshtë është. Ka punë të tjera shumë më të rëndësishme, por taksirati im s’kam çfarë bëj”, tha Spiropali.
