Gazetari Artur Zheji dhe analisti Andi Bushati kanë komentuar krizën e brendshme në të cilën është përfshirë Partia Demokratike për shkak të përplasjeve Berisha-Basha.
I ftuar në “Open”, Zheji u shpreh se kjo gjendje e PD-së është në favor të Edi Ramës, pasi sa më shumë konflikt brenda partisë më të madhe opozitare në vend, aq më shumë mbretëron Rama.
“Berisha duhet të kthehet në bazë t’u shpjegojë pse nuk e mori dot “kështjellën”. Dhe nëse do bëjë një sulm të dytë. Te përleshja në PD, mund të kishte të vrarë dhe të plagosur akoma më rëndë. Jemi akoma në 2022 dhe dalin njerëz për të vrarë. Turp t’i vijë dhe policisë nëse ka dhunuar protestuesit. Është kjo tërheqje taktike e doktorit për të shkuar në Shkodër, është një përpjekje për të rimarrë forcat.
Kjo i intereson Ramës, se sa më shumë konflikt aq më shumë mbretëron ai. I intereson dhe foltorja e Berishës dhe kundërshtitë e Bashës,” tha Zheji.
Ndërkaq, Bushati thekson se për Berishën, 8 janari ishte dështim dhe se Basha nuk doli ai lepuri që të gjithë mendonin se ishte.
“Me objektivin që kishte Berisha më 8 janar, doli një dështim. Basha doli që nuk është lepur, deri tani kishte një mendim kolektiv që sa të shkonte Berisha, Basha do ja mbathte, por ai tregoi që e do atë vend që është. Nuk jemi më në fabulën e luanit dhe të lepurit, por në fazën e dy njerëzve të armatosur. Berisha po del në bazë se po të shikosh të gjithë betejat opozitare e qytetare ndaj Ramës, pas dhunës fillon blerja. Tani e ka vendin paraja. Pasi gjakosën mburojën, këta fillojnë dhe rekrutojnë. Pushteti i parasë është më i keq se pushteti i shkopinjve e hekurave,” tha Bushati.
