Ministrat e Drejtësisë, duke filluar nga Aldo Bumçi e vijuar me Enkelejd Alibeajn, Bujar Nishanin, Eduart Halimin, Nasip Naçon, Ylli Manjanin, Petrit Vasilin e Etilda Gjonajn, nuk lanë maskarallëk pa bërë në emër të shefave. Historiku 14 vjeçar që zhbëri Drejtësinë
Ministria e Drejtësisë ka qënë gjithnjë “target” i partive qeverisëse për të abuzuar dhe vjedhur dhe jo për të rregulluar sistemin sipas ligjit. Këtë gjë ka bërë Sali Berisha gjatë 8 viteve të qeverisje së tij të dytë. Në gjurmët e tij ka ecur dhe Edi Rama në këto 6 vite si kryeministër.
Po e fillojmë me ish kryeministrin Sali Berisha, i cili erdhi në pushtet në vitin 2005 duke rrëzuar Fatos Nanon e socialistët nga drejtimin i vendit, nën moton e “duarve të pastra”.
Kamikazët e Berishës në krye të Drejtësisë që shkaktuan tragjedi
Duke qënë se objekt kemi Ministrinë e Drejtësisë, nuk kishte si të mos bënte përshtypje ngjitja në këtë post e Aldo Bumçit, pak i njohur në politikën shqiptare, por i futur përmes KOP-it.
Ministri i ri, u “dallua” gjatë gjithë drejtimit të këtij dikasteri për bindje të thellë ndaj Berishës dhe familjes së tij biologjike, përfshirë dhe miqtë për kokë të ardhur nga Serbia.
Bumçi u bë i famshëm me sjelljen e tij prej ushtari model të Shkelzen Berishës, i cili i raportonte në detaje për gjithçka bëhej për ngritjen e punishtes së vdekjes në Gërdec, ko demontoheshin armët e ushtrisë.
Ish-ministri i Drejtësisë Aldo Bumçi, nisi një faks për “Gërdecin” në adresë të Ministrisë së Mbrojtjes, për Shkëlzen Berishën. Vetë Aldo e mohoi këtë fakt, por sekretarja e tij e konfirmoi në prokurori. Bumçi nuk i raportonte Shkëlzenit vetëm nëpërmjet faksit, por edhe drejtpërdrejt dhe takimet konfirmohen nga një raport sekret që ambasada amerikane në Tiranë i kishte nisur DASH. “Në një dëshmi, sekretarja e ministrit të Drejtësisë, Aldo Bumçi, tregoi për të paktën dy takime mes Bumçit e Shkëlzenit në 2007-ën. Dhe kur u pyet për një letër që Bumçi i dërgonte Mediut për aprovim të projekt-ligjit që do t’i hapte rrugë çmontimeve në Gërdec, ajo konfirmoi që Bumçi kishte shkruar mbi kapak “Për Shkëlzen Berishën”.
Ndërkohë që Bumçi operoi në shërbim të Berishës për listën e noterëve dhe të shoqatës së Avokatëve, duke degjeneruar Ministrinë e Drejtësisë dhe vënë atë në shërbim të familjes.
Berisha e shkarkoi nga posti duke emëruar në krye të Drejtësisë Ilir Rusmalin, i cili bashkë me Ritvan Boden ishin kundër ngritjes së punishtes së vdekjes në Gërdec, nga shpërthimi i të cilës u vranë 26 të pafajshëm dhe u plagosën 30 të tjerë.
Pas akuzave të sajuara të ish-Drejtorit të Burgjeve Sajmir Shehri se vëllai i Rusmalit kërkoi favorizime për një tendër, ai dha dorëheqjen nga posti, duke deklaruar se largohej në emër të moralit dhe kërkuar Berishës që të angazhojë auditin për të hetuar shpejt të gjitha akuzat.
Berisha jo vetëm që s’hetoi, por emëroi Enkelejd Alibeajn ministër Drejtësie. Kjo s’ishte rastësi, pasi Alibeaj ishte “arkitekti” ligjor i ngritjes së biznesit të “vdekjes” në Gërdec.
Enkelejd Alibeaj është autori i e-mail-eve të famshme, të cilat janë botuar dhe në media dhe që kishin të bënin me ligjin për demontimin e municioneve në Gërdec. Ai është justifikuar me vendimin e qeverisë që përcaktonte funksionet e Zyrës Antikorrupsion, që drejtonte në kohën kur hartohej ligji i Gërdecit.
Ndërkohë që Alibeaj mbahet mend se kur ishte ministër Drejtësie tentoi të hynte me forcë në ambientet e Prokurorisë së Tiranës, për të rrëmbyer dhe shkatërruar dosjen e Damir Fazlliç.
Skandali alarmoi ambasadën amerikane dhe këtë e dëshmuan kabllogramet e zbardhura nga Uikiliks. Emri biznesmenit Damir Fazlliç përmendet në të paktën 14 kabllograme të ambasadës amerikane, përfshi tentativat e kryeministrit Berisha për ta shpëtuar boshnjakun nga hetimet e Prokurorisë. Problematika që rrethon Damir Fazlliç, trajtohet në kabllogramin e datës 14 Tetor 2008 me titull: “Berisha fillon sulmin e ri ndaj Prokurores së Përgjithshme”.
Vetëm një vit më vonë pas shpërthimit të Gërdecit dhe daljes në pah të skandaleve të Alibeajt si arkitekt ligjor i punishtes së demontimit të municioneve që shkaktoi 26 viktima dhe plagosi mbi 300 të tjerë, Berisha e zëvendësoi atë me Bujar Nishanin.
Ky i fundit nuk la gjyqtar të familjes pa mbrojtur, ndërkohë që ka akuza se ka abuzuar me listën e noterëve, ekstradimet dhe tenderat në këtë ministri. Vetëm dy vite më vonë e deri në largimin nga pushteti, në krye të Ministrisë së Drejtësisë ishte Eduart Halimi i cili u akuzua për abuzim me tenderat në burgje e ushqimin, noterët, mbrojtjen e gjyqtarëve të korruptuar, marrjen njëherësh dhe të pagës së ministrit e të deputetit.
Këtu përfundon drejtimi i njerëzve të Berishës të ministrisë së Berishës, për të ardhur në “epokën” e qeverisjes së këtij dikasteri nga njerëzit e Metës dhe të Ramës.
Ministrat e Metës e Ramës ecën nën gjurmët e paraardhësve
Ish kreu i këtij institucioni Nasip Naço, përgjatë kohës që ka qenë ministër ka pasur një sërë përplasjesh me gjyqtarët. Këta të fundit e kanë akuzuar se ka ndërmarrë iniciativa me kriminelë të akuzuar për vrasje jashtë vendit.
Në vitin 2015 Naço dha dorëheqjen, për shkak se abuzoi sërish me noterët, me ekstradimet dhe me tenderat në këtë ministri, por që me sa duket Nasipi nuk e kishte dërguar “pjesën” tek Meta, duke sjellë dhe shkarkimin automatik të tij. Preteksti ishte kundërshtimi i tij për reformën në drejtësi, kundër të cilës ishte vetë Meta.
Më pas vendin e tij e zuri, Ylli Manjani, i cili ka shënuar një sërë skandalesh, ku më i evidentuari asokohe ka qënë ai i licensave të noterëve për persona të dënuar. Më vonë shpërtheu skandali i byzylykëve, për të cilin Manjani është thirrur edhe në Prokurori, një skandal që i ka kushtuar buxhetit të shtetit mbi 2 milionë euro, për një “mall” i cili u bë hyrje vetëm me letra.
Manjani akuzohet se ka pasur abuzime për pesë tendera, përfshirë këtu edhe atë të byzylykëve të zhvilluar në vitet 2016-2017 me vlerë 4.4 milionë euro. Këto janë të dhënat e konfirmuara nga Prokuroria. Në të pestë tenderat e audituar, fitues kanë dalë operatorët ekonomikë me vlerat më të larta, ndërsa konkurentët e tjerë janë paraqitur pa ofertë, pse pa dokumentacione.
Manjani akuzohet dhe për vonesën e përkthimit të dokumenteve të ardhura nga Greqia në ngarkim të supertrafikantit të drogës Klemend Balili, mikut të Metës, vonesa e të cilave e lejoi atë që të qëndronte 2 vite në arrati.
Ylli i LSI përfitoi një banesë në Sarandë nga ‘Balilët’ për të gjitha shërbimet që ka bërë në drejtim të tyre. Përveç Manjanit për skandalin me tenderat përfshirë dhe “Byzylykët” nën hetim është vënë dhe ish ministri tjetër i LSI, Petrit Vasili.
Dhe “qershia” mbi tortë është ministrja aktuale e Drejtësisë, Etilda Gjonaj, e emëruar direkt nga Edi Rama në këtë post, me këmbënguljen e fortë të ish ministrit të Brendshëm Fatmir Xhafaj.
Vetëm në pak kohë, Gjonaj u bë pjesë e skandaleve dhe është kthyer në ministren më të lakuar për shkelje të ligjit dhe keqpërdorim të detyrës zyrtare. Ekzistojnë dhjetra fakte që hedhin dritë mbi skandalet nëpërmjet tenderave, licensimit të noterëve apo konkurseve të tjera fiktive.
Të tjera fakte që vërtetojnë kundërligjshmëritë e firmosura nga Gjonaj zbardhen në një raport të dalë nga një inspektim në Ministrinë e Drejtësisë. Aty tregohej, se si vendimet në emër të saj, merreshin nga persona të tjerë jashtë kësaj ministrie, si nga Fatmir Xhafaj. Edhe Gjonaj akuzohet në raportin për licensime në kundërshtim me Ligjin për Noterinë.
Së fundmi është publikuar në media, vjedhja që bëhet nëpërmjet këtij institucioni nga Ministrja Etilda Gjonaj. Mijëra euro shpenzime për udhëtime dhe akomodime në hotele luksoze janë regjistruar nga ministrja Gjonaj, ndonëse kjo e fundit e mohon se ka abuzuar. Rasti konkret ka qënë ai i akomodimit në një hotel në Romë, ku për një natë janë paguar 706 euro.
Ky është një profil i paautorizuar i ministrave të drejtësisë së Berishës, Metës dhe Ramës, të cilët në fund të herës kanë abuzuar të gjithë në emër të shefave me Hipotekat dhe Burgjet./Pamfleti
