Teksa ndodhet në Lezhë ku po feston 31-vjetorin e themelimit të PD-së së Lezhës, Sali Berisha ka ngritur akuza ndaj Edi Ramës dhe Lulzim Bashës, të cilët sipas tij po mbajnë peng pluralizmin në Shqipëri.
Ish-kryeministri theksoi se Rama ka një qëndrim anti-shqiptar dhe se Shqipëria është i vetmi vend që arreston qytetarë për çështje civile. Ai gjithashtu u shpreh se më 8 janar, kryeministri Rama tregoi se ishte autori i pushtimit të PD, me urdhër nga Beogradi.
“Njëlloj si lulet që celin para syve tuaj filluan të mbijnë në të katër anët e vendit përpjekje tuaja dhe të shqiptarëve të lirë për një jetë ndryshe. Filluan të krijohen bizneset e vogla dhe kushdo që e shikoj grafikun që e nxjerr grupi i Edi Ramës shqiptarët nuk po largoheshin më dhe kishte shpresë. Kishte shumë pak para dhe mallra në treg, shumë varfëri por lindi shpresa dhe çdo vit të ardhurat u dyfishuan.
Sot kemi një armik shumë të rrezikshëm, më shumë se ai që ishte para viteve ’90. Ai ishte një diktator që kishte urdhëruar vrasje politike dhe vriste të rinj në kufi dhe i zvarrite nëpër qyteteve, por ai e kuptoi se nuk mund që të dilte përballë sfidës së pluralizmit. Ndërsa sot kemi një armik më të madh, ku kreu i meduzës mendon se do të mbajë peng pluralizmin siç mban Lulzim Bravën. Mendon se mund të përzërë nga Shqipëria të rinjtë e këtij vendi. Jugu i vendit është shpërngulur, janë dhjetëra fshatra pa banorë.
Sot ka një qeveri që si një lubi e pangopur vetëm vjedh, ku ndërtimi i një kilometri rrugë me paratë e tuaja kushton 8 herë më shumë, ndryshe nga ajo që financohet nga bankat e huaja. A mund të imagjinoni jnu një kryeministër që në 7 muaj fluturon 27 herë me avion, duke shpenzuar pafund, sepse ju ju konsideron qenie inekzistente dhe veten një bajloz. A mund të imagjinoni një qeveri që shpërdoron në tetë vite 8.2 miliardë vite”, ka thënë Berisha.
Ndër të tjera nga Lezha ish kreu i demokratëve është shprehur se PD-ja është më e fuqishme se kurrë, dhe në misionin e saj për rikthimin e votës së lirë, ndërsa në PS kjo e drejtë që në 2009 nuk është ushtruar më.
“Qëllimi ynë është përmbysja e narko-shtetit dhe dërgimi i vendit në zgjedhje të lira. PD-ja sot është më e fuqishme se kurrë, ne jemi në misionin për të kthyer votën e lirë te shqiptarët. PS-ja nga 2009 deri më sot nuk ka votuar asnjëherë, në atë parti skam ë votim por i zgjedh kryetari si tufë kush do jetë ministër e kush jo dhe shumica i merr vesh nga media. Ku u katandis partia tjetër në raport me votën? E patë të gjithë”, është shprehur ndër të tjera ai.
