Presidenti i SHBA Joe Biden ka deklaruar se mbështet fuqimisht kërkesat historike për anëtarësim në NATO të Finlandës dhe Suedisë.
Përmes një deklarate në prag të takimit me liderët e dy vendeve në Uashington, Biden u shpreh se: “Mezi pres të punoj me Kongresin e SHBA-së dhe aleatët tanë të NATO-s për të sjellë shpejt Finlandën dhe Suedinë në aleancën më të fortë mbrojtëse në histori.”
I ndalur tek një kërcënim i mundshëm rus, Presidenti amerikan siguroi se: “Shtetet e Bashkuara do të punojnë me Finlandën dhe Suedinë për t’u mbrojtur nga çdo kërcënim ndaj sigurisë sonë të përbashkët dhe për të penguar dhe trajtuar agresionin ose kërcënimin e agresionit, ndërkohë që aplikimet e tyre për anëtarësim në NATO janë duke u shqyrtuar”.
