Fluturimet ajrore në vend nga aeroporti i Rinasit, i vetmi funksional në vend, janë të bllokuara totalisht prej ditës së djeshme. Lidhur me këtë ngjarje prokuroria e Tiranës ka nisur hetimin për të gjithë punonjësit që janë në protestë, duke theksuar se hetimet do vazhdojnë dhe për disa zyrtarë të lartë që kanë qenë në dijeni për ngjarjen e zhvilluar.
“Hetimit pritet t’i nënshtrohen dhe zyrtarë të lartë të cilët kanë pasur informacion për mënyrën se si po rrjedhin ngjarjet dhe se si mund të shkohej në paralizimin e punës në aeroportin e vetëm në vend”, raportoi Klodiana Lala
Protesta e kontrollorëve të kompanisë “AlbControl” për shkak të përgjysmimit të pagës nga pandemia, kanë krijuar një gjendje kritike në vend, duke ndaluar dhe ardhjen e vaksinave që priteshin të mbërrinin dje. Në polici u shoqëruan 26 persona, ku katër prej tyre u lanë të lirë, ndërsa bëhet me dije se tre prej tyre ndodhen ende në ambientet e policisë.
Reagimi i plotë:
“Në orët e vona të mbrëmjes së kaluar Prokuroria e Tiranës njoftoi se ka çelur një hetim penal lidhur me situatën e krijuar në aeroportin e Rinasit ku pas bojkotit të punës nga ana e kontrollorëve është paralizuar gjithë puna dhe nuk ka pasur asnjë avion të jetë ulur apo të jetë ngritur nga pikëpamja e aeroportit më të madh në vend. Burime zyrtare pranë organit të akuzës bëjnë me dije se hetimi ka nisur për veprën penale të shpërdorimit të detyrës.
Prokuroria është duke sekuestruar të gjithë dokumentacionin, si kontratat e punës, por edhe është duke marrë në pyetje të gjithë kontrollorët që pretendojnë se janë të paaftë përkohësisht për të kryer punën për shkak të stresit të krijuar edhe nga përhapja e COVID-19 dhe më pas do të ketë dhe një rimarrje të tyre në pyetje lidhur me pretendimet që kanë ngritur. Ky bojkot i kontrollorëve ka sjellë dhe bllokim të punës duke sjellë një dëm të madh ekonomik, ndërkohë që janë dhjetëra qytetarë që nuk kanë mundur të fluturojnë.
Hetimit pritet t’i nënshtrohen dhe zyrtarë të lartë të cilët kanë pasur informacion për mënyrën se si po rrjedhin ngjarjet dhe se si mund të shkohej në paralizimin e punës në aeroportin e vetëm në vend”, raportoi gazetarja Klodiana Lala.
