Cilët janë 3 ministra, 8 deputetë e 11 kryepolicë të përmendur në këto dëshmi?
Qysh prej 30 marsit, SPAK ka në dorë killerin Nuredin Dumani, i cili ka pranuar të rrëfejë gjithë vrasjet e bëra vetë, ato me grupin e tij, porositë me pagesë dhe rrjetin e 8 grupeve kriminale që “lanin e hesapet” me njeri-tjetrin e bënin biznes me vdekjen.
Ky është i pari i penduar, që ka konfirmuar shumë krime të rënda, të mbyllura nga pazarxhinjtë e drejtësisë në 15 vitet e fundit, të cilët nuk ka nevojë t’i deklarojë me emra Nuredin Dumani, sepse emrat e prokurorëve dhe gjyqtarëve që i kanë shpëtuar nga burgu, janë në dosjet përkatëse.
Alarm është fakti, se në dëshmitë e Dumanit kanë dalë emra politikanësh, ministrash, kryepolicësh, avokatësh e kryebashkiakësh, me role si mbështetës, mbrojtës e palë interesi në krime, mes tyre edhe Presidenti i vendit Ilir Meta, si porositës i vrasjes së vëllait të deputetit të PS- Lezhë.
Detajet e emrave të kriminelëve, viktimave, porositësve, pagesat për çdo vrasje, vendet dhe data e realizimit të tyre, dëshmojnë se Nuredin Dumani ka mbajtur “ditar kronologjik” për çdo rast.
“Kutia e zezë” që ka hapur vrasësi Nuredin Dumani, me të dhëna për përfshirjen e politikanëve, me forma, lidhje e interesa të ndryshme në shumë krime, na kujton “Bllokun e Kuq” që iu gjet pas vrasjes, prokurorit të famshëm anti-mafie, Paolo Borselino në Itali.
Në atë bllok, që klani mafioz brenda policisë e drejtësisë italiane e zhduku me urdhër të mafies politike, ishte “ditari” me skemat e planit të vrasjes së Falcones, dhe emrat e politikanëve e zyrtarëve të drejtësisë, të përfshirë në këtë vrasje, si pjesë e grupit “Cosa Nostra- Toto Riina”.
Në dëshmitë e Dumanit, del konkretisht me emra e ngjarje, fakti që vetë Dumani, grupet kriminale Sanxhaktari, Çela, Edison Harizaj, Mihasi, Capja, Sharra, Haxhiaj etj., kanë pasur përdorje, mbështetje, favorizim e mburojë nga politikanë dhe zyrtarë të policisë e drejtësisë.
Të tillë rrjet, kishte skeduar dhe Paolo Borselino në “Bllokun e Kuq”, ku zbulonte lidhjet dhe bashkëveprimin e katërkëndëshit mafioz: “Politikë-drejtësi-Oligarkë-Cosa Nostra” në Itali, që inskenoi dhe realizoi vrasjen e Giovani Falcones dhe pas 2 muajsh të vetë Borselinos.
Kështu deklaroi pas vrasjes së Paolo Borselino edhe Leoluca Orlando, Kryetar i Bashkisë së Palermos, i cili tha në gjyq, se mafia që vrau prokurorët Falcone, Borselino, kishte informacion, ndihmë dhe mbrojtje të plotë nga aparati i lartë politik, shtetëror, policor dhe nga drejtësia italiane.
Sot, SPAK-u ka në dorë “Kutinë e zezë” me dëshmitë e Dumanit, për aktivitetin e grupeve kriminale që kanë vepruar lirshëm në Elbasan, Durrës, Tiranë, Fier, Lezhë, Shkodër e Vlorë.
Si mbështetës dhe mbrojtës të aktivitetit të tyre, deri me licenca, tenderë, punësime në sektorët e sigurisë kombëtare, Dumani ka nxjerrë shumë emra të krerëve të politikës, pushtetit, policisë, drejtësisë, madje dhe përdorje në vrasje të paguara prej Presidentit të Republikës.
Këto dëshmi, kanë tmerruar kupolën e politikës dhe drejtësisë, deri sa kanë bërë presion ndaj SPAK-ut, ose kanë rënë dakord me të, për të kërcënuar zyrtarisht e publikisht me 5 burg, mediat që do publikojnë dëshmi të Dumanit, të cilat po prekin mafien politike e shtetërore.
SPAK, të lërë median në punën e saj, dhe të hetojë gjithë prokurorët e gjyqtarët, që nuk kanë dënuar apo kanë liruar nga burgu me pushime çështjesh e hetime false, Nuredin Dumanin etj;, sepse disa prej tyre, sot janë në qeveri, deputetë, anëtarë komisionesh të “Veting”, në KLP, KLGJ, KED, ILD, në Prokurorinë e Përgjithshme dhe në SPAK, Gjykatën e Lartë dhe atë Kushtetuese.
Puna e SPAK, nuk është detyrimi i medias, për të ndaluar publikimin e dëshmive, pikërisht tani që Dumani po nxjerr emra politikanësh, por t’i hetojë ata, duke filluar nga Presidenti Ilir Meta, Taulant Balla, 3 ministra e 8 deputetë e 11 kryepolicë të përmendur në këto dëshmi./Pamfleti
