Kryeministri britanik, Boris Johnson ka pohuar se Vladimir Putin nuk do të kishte pushtuar Ukrainën nëse do të ishte një grua.
Ai tha se lufta është një “shembull i përsosur i maskulinitetit toksik”, raporton The Guardian.
Në një intervistë me mediat gjermane pas samitit të G7 në Schloss Elmau, kryeministri britanik përmendi gjininë e presidentit rus si një faktor kontribues në konflikt.
“Nëse Putini do të ishte një grua, gjë që ai padyshim nuk është, nëse do të ishte, me të vërtetë nuk mendoj se ai do të kishte nisur një luftë të çmendur për mënyrën e dhunshme që ka.
Nëse doni një shembull të përsosur të maskulinitetit toksik, kjo është ajo që ai po bën në Ukrainë.”, i tha Johnson transmetuesit gjerman ZDF.
Kjo deklaratë vjen pasi udhëheqësit perëndimorë përfunduan samitin treditor të G7 në Gjermaninë jugore duke premtuar se do të rrisin kostot ekonomike dhe politike për Putinin dhe regjimin e tij të luftës së Rusisë në Ukrainë.
Johnson prej andej ka udhëtuar në Madrid për një samit të NATO-s së bashku me sekretaren e jashtme, Liz Truss.
Prania ushtarake britanike në Estoni do të forcohet pasi NATO-ja përshkallëzon në mënyrë dramatike aftësinë e saj për t’iu përgjigjur Rusisë. Udhëheqësit e aleancës prej 30 anëtarësh do të bien dakord të bashkëpunojnë më ngushtë dhe të rrisin ndjeshëm numrin e trupave të mbajtura në gatishmëri të lartë.
Mbretëria e Bashkuar tashmë ka një prani të konsiderueshme ushtarake në Estoni dhe kryeministri do ta përdorë takimin për të zgjeruar selinë e saj në vendin baltik.
Aleanca planifikon të ketë 300,000 trupa në gatishmëri të lartë – nga 40,000 aktuale – dhe Britania e Madhe do të angazhojë aftësitë në tokë, ajër dhe det për “modelin e ri të forcës”.
