Në dhjetor ligji hyn në fuqi dhe menjëherë i lind detyrimi Autoritetit të Dosjeve që të nisë procedurat për të publikuar dokumentet dhe të dhënat që përmban dosja e Ilir Metajt…
Hapet rruga për zbulimin e dosjes së Sigurimit për ish-presidentin e Republikës, Ilir Meta/j.
Mazhoranca dhe Autoriteti i Dosjeve kanë ngritur dyshime se Meta ka qenë bashkëpunëtor i Sigurimit të Shtetit. Më 21 tetor, Kuvendi i Shqipërisë ndryshoi ligjin për hapjen e dosjeve, duke eliminuar të gjitha pengesat për të zbuluar dosjen e ish-presidentit. Ligji është dekretuar sot nga Presidenti Bajram Begaj.
“Pamfleti” pak ditë më parë bëri një artikull për zvarritjen e dekretimit dhe Begaj ka marrë vendim në limitet e afatit, pasi brenda 20 ditësh ai duhej të shprehej ose ligji do të kalonte në heshtje. Sot ligji është publikuar në Fletoren Zyrtare dhe pas 15 ditësh ai hyn në fuqi. Kjo do të thotë se në dhjetor ligji hyn në fuqi dhe menjëherë i lind detyrimi Autoritetit të Dosjeve që të nisë procedurat për të publikuar dokumentet dhe të dhënat që përmban dosja e Ilir Metajt. Pra muajin që vjen do dalin në dritë spiunllëqet e ish-presidentit.
Vetë kryetarja e Autoritetit ka paralajmëruar se me miratimin e ligjit, të dhënat për Metën dhe 5 funksionarë të tjerë do të publikohen në faqen zyrtare të AIDSSH. Kjo do të thotë se tashmë ka nisur numërimi mbrapsht për Metën.
Në vitin 2015 u miratua ligji për hapjen e dosjeve, por PS dhe LSI në atë kohë futën një nen që ndalonte verifikimin e emrave që ishin subjekte të komisioneve Bezhani dhe Mezeini. Meta ishte verifikuar prej tyre dhe AIDSSH nuk e verifikonte dot për së dyti.
Për këtë arsye mazhoranca dhe grupi i Alibeajt në PD ranë dakord për ndryshimin e ligjit, duke vendosur që dosjet të hapen për të gjithë. Pra, nga muaji dhjetor e gjatë vitit 2023 do ketë zhvillime të forta sa i takon lidhjeve me ish-Sigurimin. /Pamfleti
