6 dhoma gjumi, 7 banjo, palestër, teatër, bar, bibliotekë, sallë lojërash, pishinë, garazh për 5 makina, kopsht perimesh, agrume, lëndinë dhe madje edhe një kotec pulash.
Kjo është vila luksoze në Montecito, dy hapa nga qendra e Santa Barbara-s në Kaliforni, ku u filmua seriali dokumentar mbi princin Harry dhe Meghan i transmetuar në Netflix. Vila në serialin dokumentar nuk është ajo ku ata jetojnë, megjithëse vendbanimi i tyre është vetëm 9 minuta nga shtëpia mbretërore.
Vila ku u xhirua dokumentari i ka të gjitha karakteristikat që mund t’i përkiste një çifti mbretëror. Me pamjet e saj gjithëpërfshirëse të Oqeanit Paqësor, tavanin madhështor të lisit dhe brendësinë e dizajnuar në mënyrë të përsosur, ajo është padyshim një shtëpi mbretërore.
Ndër dhomat më të mahnitshme është sigurisht dhoma e ndenjes, ku çifti ka zhvilluar intervistën, e karakterizuar nga një hapësirë e madhe e pajisur me një piano të madhe, një llambadar gjigant dhe një pamje të mrekullueshme të kopshtit që të lë pa fjalë.
Kuzhina ka banakë mermeri dhe një hapësirë për një tavolinë ngrënieje. Dhoma e gjumit kryesore ndodhet në katin e parë dhe është e rrethuar me dyer xhami që të çojnë në një tarracë. Banja kryesore ka një vaskë dhe dush xhami. 5 dhomat e gjumit shtesë kanë të gjitha tarraca private. E ndërtuar në vitin 2006, prona prej 4000 metrash katrorë ka qenë në treg që nga gushti 2021 dhe çmimi i kërkuar nuk ka rënë që atëherë dhe mbetet në 33.5 milionë dollarë.
Montecito, në lindje të qytetit të Santa Barbara, është një komunitet i pasur plazhi dhe shtëpia e disa prej pasurive të paluajtshme më të shtrenjta në botë. Në këtë dokumentar i cili grumbulloi më shumë shikues se çdo dokumentar tjetër gjatë javës së parë të tij, Duka dhe Dukesha e Sussex ndajnë një këndvështrim të ndryshëm për romancën e tyre.
